Gula 47
“Oo. Pero mao lagi, lakip kaming nagtinarong sa serbisyo naangin sa pagpabadlong sa ubang mga sakop sa PNP. Hangtod nga diyotay na lang hinuon ang misalig sa among katakos pagsumpo sa kriminalidad. Unsaon nga duna man sab gu’y badlongon nga mga polis.”
“Bitaw kanang mga police scalawags ug ubang kurakot nga mga sakop sa PNP maoy nakaguba sa nindot nga image sa polisya.”
“Mao gyud. Mao nga kun makadungog mi nga atakehon mi’g maayo sa taga media, mangiyugpos na lang. Unsaon nga kami mismo nakasud-ong man sa pagpangabuso sa pipila namo ka mga kauban.”
“Kusog ra ba sab nangatake sa kapolisan ang maong mga kolumnista sa Bantay Balita. Mga hard-hitting man gud ang among mga kolumnista.”
Bitaw. Maayo man sab kana ba, aron dili magpatuyang ang mga abusado.”
May isulti pa unta si Roy sa dihang kalit kining nakatindog ug miduol sa may bentana. Gisunod kini ni Sonia.
Matingad-on si Sonia nga misunod kang Roy nga mipahipi sa kilid sa bentana ug mainampingon nga milili ngadto sa gawas.
“Ngano, Roy?” Nangutana si Sonia.
Ayaw’g saba,” hagawhaw ang tingog ni Roy.
Milili kini ngadto sa gawas dungan ang pagsenyas kang Sonia sa pagbalik ngadto sa sopa.
Pagkataodtaod, mibiya si Roy sa kilid sa bentana ug miduol kaniya. -- Sumpayan pa