Sa malipat lang

Bisperas pa lang gani sa pista, diha na si Willy sa lungsod sa Catmon. Dala gihapon niya ang tanan niyang mga gamit alang sa iyang negosyo, nga mao ang pagpahigayon og dula nga lipatlipat. Kanang dula nga maggamit og mga tabon sa botelya ug liso sa biyatiles, ug papustahan.

Iya gihapon gidumdom ang puwesto niya sa milabay nga pista. Nga diha sa likod nga bahin sa may plasa, nga diha sa luyo sa stage. Nga duol ra usab sa sea wall.

Didto man gud ipahimutang ang ubang mga duwaan, kon mga kalingawan. Sama sa shooting gallery, roletas, binggo ug uban pa. Lakip na usab ang mga naninda og mga duwaan para sa mga bata.

Bisan tuod og bisperas pa lang kadto sa pista sa lungsod, daghan na kaayo ang mga tawo diha sa may plasa. Gikatakda man sab gud nga koronahan ang napiling Miss Catmon, nianang gabhiona. Ug duna say disco nga gipahigayon sa wala pa sugdi ang koronasyon.

Tungod sa kadaghan sa mga tawo, ubay-ubay usab ang nanugok sa nagkalainlaing mga kalingawan nga gipahigayon sa gawas sa plasa. Lakip sa gidugokan   pag-ayo mao ang lamesa ni Willy diin niya ipahigayon ang dula nga lipatlipat. Ilabi na kadtong mahilig mamusta niini. Ug kadtong wala gayud masayod nga binuang diay ang maong dula.

Maisip man gud nato nga binuang ang maong dula, kay gimaniobra man kini ni Willy. Wala man gyu’y dag-anan ang mamusta niini. Kay ang padag-on lang niini, mao man kadtong gagmay ra’g pusta.

Maniobrahon man gud ni Willy ang maong dula. Kay sa tinuoray, wala man gyu’y sulod sa liso ang mga tabon nga iyang gipapilian. Anha man lang niya ibutang ang liso, sa dayon na niyang ukab sa tabon nga iyang buot padag-on. Duna man gud siya’y laing liso nga giandam, ug gibutang lang diha sa iyang kuko.

Tungod kay ubay-ubay gayud ang nailad ni Willy pinaagi sa dulang lipatlipat, ubay-ubay usab ang kuwartang iyang natigom. Gani, nag-akal na sa papel de bangko nga tag manggatuson ang iyang pitaka, nga gisulod usab niya sa likod nga bahin sa iyang karsones. Iya man gud ipatibuok dayon ang iyang madaog.

Tungod sa kagamay ra sa lamesa ni Willy, naghuot pag-ayo ang mga tawo nga nag-alirong niini. Diha pa gani, nanagtindog sa iyang luyo. Kay huot naman sab kaayo ang dapit sa iyang kiliran.

Sa dihang nabanabana na ni Willy nga ubay-ubay na gyud ang kuwartang iyang natigom, mihukom nalang siya nga undangon na lang ang dula nga lipatlipat. Labi na kay nagsigi na sab og paghagad og inom ang usa sa iyang mga higala, nga usa usab ka paryente.

Maong giingnan na lang niya ang mga mamustahay nga pabalikon na lang inig ka ugma. Total ugma pa man sab ang kahulugan kon ang pista.

Apan kalit lang nga gikulbaan si Willy, kay sa dihang gihikap niya ang iyang bulsa, wala naman diha ang iyang pitaka. Iya pa ganing gisusi ang ilawom nga bahin sa iyang gilingkuran, apan wala usab kini didto.

Hangtod nga miabot sa hunahuna ni Willy, nga daghan kaayong mga batan-ong lalake ang nanagbarog diha sa iyang luyo samtang nagpadula siya og lipatlipat. Ug nakaingon siya nga gikuot gayud kadtong iyang pitaka. Nalipat lang gayud siya. (Kataposan)