Misyon sa kasingkasing

Gula 39

Miusab pag-text si Debra kaniya. Mao ra gihapon ang tuyo niini. May dala nang pagpamugos ang awhag niini kaniya nga magminyo na sila, bisan secret marriage lang una. Wala na tubaga ni Bradley ang maong text ni Debra.

Pagkasunod adlaw, nagsaulog si Debra sa birthday niini. Of course, gidapit sa dalaga si Bradley. Gikuyog usab ni Bradley si Sandra sa pagtambong sa salo-salo nga giandam alang sa pagsaulog ni Debra sa ika-22 nga sumad sa adlaw’ng natawhan niini.

Dili unta mokuyog si Sandra kay aloof siya sa girlfriend ni Bradley. Uga kini’g tinagdan kaniya sa una nilang panagkita mao nga wala siya’y interes nga makigsuod niini. Apan gipugos siya ni Bradley sa pagkuyog. Gipasaligan siya niini nga dili siya ma-out-of-place mao nga mikuyog siya.

Giatol sa gabii ang pagpahigayon sa salo-salo aron pagseguro nga makatambong gayod ang tanang mga dinapit ni Debra. Pag-abot nila ni Sandra sa Banawa, diha na ang tanang mga dinapit sa girlfriend ni Bradley. Sila na lang tingali ang gipaabot. Dili kaayo daghan ang nanambong tungod kay pinili lang ang mga dinapit sa maong okasyon. Igo-igo lang usab ang kahimtang nila ni Debra.

Misugat si Debra pagkamatikod nga nahiabot na sila. Mi-kiss dayon kini ngadto kang Bradley. Igo lang mitimbaya si Debra kang Sandra. Uga gihapon ang pagtagad niini kaniya. Apan wala na kini ikahibulong ni Sandra tungod kay nag-expect na siyang daan nga mao gayod kini ang posibleng mahitabo. -- Sumpayan pa