Misyon sa kasingkasing

Gula 38

Naluoy siya kang Sandra. Alang kaniya, lig-on ang hinungdan kun nganong milayas si Sandra sa ilang pinuy-anan. Mituo siya sa tanang gisugilon sa dalaga kaniya. Nasihag niya sa hun-ag sa panagway niini ang dako niining kahadlok nga pugson kini sa pagpakasal ngadto ni Morris Sta. Ana.

Wala makasabot si Bradley sa iyang kaugalingon kun nganong ingon na lang niini kadako ang gibati niyang kaluoy ngadto kang Sandra. Wala siya makatugkad sa hingpit kun nganong lakip siya mibatig kahingawa sa kahimtang sa dalaga nga unta wala man siya’y labot sa kinabuhi niini. Ang iya lang nasabtan mao nga gusto niya kining tabangan sa bisan unsang paagi.

Natugaw ang paghanduraw ni Bradley dihang mitingog ang message alert tone sa iyang cellphone nga gipatong sa ibabaw sa lamesita nga nahimutang dapit sa ulohan sa iyang katre. Iya kining gikawhat ug gisusi kun kinsay nag-text kaniya. Si Debra diay.

Sa text ni Debra, subling miawhag ang dalaga kaniya nga magminyo na sila. Nakapanglingo si Bradley. Ngano bang naingon man niini si Debra karon? Mora ba’g insecured kini sa ilang relasyon mao nga gusto kining maneguro nga sila gayod ang magkadayon.

Gi-reply niya ang text ni Debra. Iya kining gibalibaran. Iya kining gipasabot nga dili pa siya andam nga magpagapos sa kaminyoon tungod kay daghan pa siya’g angay atimanon. Daghang mga kaso nga gidangop sa ilang buhatan nga siya maoy gitahasan sa pag-imbestigar. Unya na tingali siya mohukom sa pagminyo kun masulbad na niya ang maong mga kaso. -- Sumpayan pa