Gikasilagan ko ang kalibotan

Gula 45

Samtang nagsulat si Sonia sa iyang balita, ang gipanagsultihan nila ni Roy wala mapapas sa iyang hunahuna. Misantop sa iyang kaisipan nga posibleng tinuod ang pangagpas ni Roy mahitungod sa misteryosong tawo nga nanawag kaniya sa telepono -- nga kini mao ra usab ang nagpatay sa duha ka babaye.

Ang nanuslok sa hunahuna ni Sonia kun kinsa man kaha ang maong tawo? Daghan siya’g mga higala ug mga kaila. Iyang gisulayan paghinumdom ang mga lalaki nga nakaila siya kaniadto ug karon. Pero wala gayod siya’y nahinumdoman nga may usa kanila nga susama’g tingog sa misteryoso niyang caller.

Tungod kay sayo siyang nahuman sa pagsulat sa iyang news items, sayo sab siyang migawas sa BBN Publications. Midiretso siya’g pauli sa iyang gipuy-an. Gusto siyang mopahulay og sayo kay ugma, nagplano siya nga makigkita sa mga ginikanan ni Ninez, ang burikat nga gipatay.

Nahisagmuyo siyang naghunahuna nga wala gayo’y mga residente sa Manga nga nakakita kun kinsay naglabay sa patay’ng lawas ni Ninez sa suba. Tingali, giatol sa responsable sa krimen ang paglabay sa patay’ng lawas sa biktima sa tunga nang gabii kanus-a nahinanok na ang tanan.

Apan ugma puhon, ipadayon niya ang pakisusi. Moabag siya sa kapolisan sa paghimo’g imbestigasyon. Daghan nang mga kaso nga nasulbad gumikan sa panabang sa taga media. Ug kun makatabang siya pagsulbad sa kaso sa kamatayon ni Helen Ogmoc ug Ninez, lain na usab kini niyang achievement. -- Sumpayan pa