Gikasilagan ko ang kalibotan

Gula 44

“Tingalig usa siya sa daghan mong mga fans.”

“Imposible.”

“Bitaw, mao kanay atong sutaon... kun nganong concern man kaayo ang misteryoso mong caller sa imong career.”

Nakapanghupaw si Sonia. Gibati niya ang kalibog samtang naghunahuna sa mga panghitabo.

“Wala ka ba gyud makaila sa iyang tingog sa higayon nga magkasulti kamo sa telepono?” Pangutana ni Roy. “Ang buot kong ipasabot, wala ka bay nahinumdoman nga may kaila o higala ka nga kaanggid og tingog sa misteryoso nimong caller?

“Wala gyud, Roy,” tubag ni Sonia. “Sa akong pagpaminaw sa iyang tingog, mora’g dili kini ordinaryo. Mora’g gituyo pag-usab aron dili mailhan.”

“Kun mao kana, posible gyud nga kaila nimo ang killer. Maong giusab niya ang iyang tingog aron dili ka makaila kaniya.”

“U-unsa?”

“Mao kana, Sonia. Mao nga angay ka usab nga magbantay.”

“Nga-ngano man?”

“Tungod kay kun serial killer ang responsable sa kamatayon nilang Helen Ogmoc ug Ninex, dako’g posibilidad nga may depekto sa utok ang maong tawo hinungdan nga nakahimo siya niini. Ug kun matinuod ang akong pangagpas nga kaila nimo ang maong tawo, posibleng ikaw mameligro usab sa umaabot.” -- Sumpayan pa