Misyon sa kasingkasing

Gula 35

“Kun mobiya ka dinhi, asa ka na man sab mopaingon?”

“Bahala na ning akong kinabuhi. Basta kay dili ko mopauli ngadto sa Davao aron lang himuong willing victim.”

“Dili ko mosugot nga mobiya ka dinhi, Sandra,” ni Bradley sa tingog nga tugob sa kaligdong.

“B-Bradley...” Mao ray nalitok ni Sandra nga ingon sa dili makatuo.

“Karon nga nasayod na ako sa matuod nga hinungdan sa imong pag-anhi sa Cebu, dili makatugot ang akong konsensiya nga pasagdan ka. Nasayod ko nga labaw kang nagkinahanglan kanako karong panahona.”

“Bradley, salamat. Salamat nga nakasabot ka.”

Ug tungod ba kaha sa gibati niyang kahinangop ug kalipay, nakahilak siya.

“Panalipdan ko ikaw, Sandra,” ni Bradley pa. “Tabangan ko ikaw nga makalikay gikan kang Morris Sta. Ana.”

Wala na gayod makapugong si Sandra sa iyang kaugalingon. Gigakos niya si Bradley. Ingon gani sa nakalitan ang ulitawo sa iyang paggakos niini.

Dihang mibalik na sa normal ang iyang emosyon, milugak si Sandra sa paggakos kang Bradley.

“Ililong nato ni bisan kinsa ang bahin sa matuod nga nahitabo kanimo,” matud ni Bradley. “Bisan si Mama Diday dili nato tug-anan nga milayas ka gikan sa poder sa imong mga ginikanan aron dili na kini magdaghan pag kuti-kuti. Okey?” -- Sumpayan pa