Gikasilagan ko ang kalibotan

Gula 42

Giugkat gilayon sa kapolisan ang patay’ng lawas sa babaye. Nailhan dayon sa kapolisan ang biktima. Ang babaye nga gipatay mao si Ninez, usa ka iladong burikat sa dakbayan sa Tagbilaran.

Sa gihimong pakisusi sa kapolisan, wala lugosa ang biktima. Wala usab kini tulisa kay diha pa man ang kuwarta ug mga alahas niini, lakip ang cellphone. Mao nga sama sa kaso sa kamatayon ni Helen Ogmoc, walay ideya ang kapolisan kun unsay motibo sa mamumuno sa pagpatay ni Ninez.

Pero si PO1 Roy Cleopaz giabot na’g katahap.

“Nagtuo ko nga ang nagpatay kang Helen Ogmoc ug sa burikat nga si Ninez usa ra ka tawo,” nagkanayon si PO1 Cleopaz.

Ingon sa dili makatuo si Sonia sa teyoriya nga gipadayag ni Roy.

Wala magdahom si Sonia sa teyoriya nga gipadayag ni PO1 Roy Cleopaz kaniya. Wala siya makaagpas kun nganong mao kadtoy nakab-ot nga pangagpas sa polis.

“Nganong nakaingon ka man, Roy,” ni Sonia pa, “nga posibleng usa ray responsable sa kamatayon ni Helen Ogmoc ug ni Ninez?”

“Simple lang, Sonia,” matud ni Roy. “Ang estilo sa pagpatay sa duha ka biktima managsama ra.”

“Wala ko ikaw hisabti?”

“Ang patay’ng lawas ni Helen Ogmoc nakaplagan nga gilabay nga gisulod og plastic bag. Mao usab ang patay’ng lawas ni Ninez. Pareho usab nga gisamadsamaran sa mamumuno ang ilang nawong.” -- Sumpayan pa