Tungod sa bahad

Gabii. Sama sa naandan nia na sab ko sa gitrabahoan kong Night Club. Maoy akong trabaho dinhi ang pag-atiman sa mga kustomer ug ang paghatag kanila sa ilang mga order. May higayon nga binastosan ko sa mga kustomer apan pilit ko kining gidawat basta makakuwarta lang ko. Taga Mindanao ko ug mianhi lamang dinhi sa Sugbo tungod sa sugo sa akong inahan. Taudtaod na ang pagpuyo ko dinhi sa Sugbo ug nahurot ko na sa paggasto ang salapi nga gipabalon ni Mama nako busa naaghat ko sa pagtrabaho.

Samtang naglingkod ko duol sa pultahan sa Night Club may nasigpatan kong usa ka lalaki nga misulod. Desente ang iyang panapot ug may pangedaron na nga sa akong banabana mokabat na sa singkuwenta anyos. Midali ko'g barog ug gisugat ko dayon siya.

"Adto ta didto, Sir!" Nako pa dayong tudlo sa bakanteng lamesa nga nahimutang sa suok nga bahin sa klab. Ug gikuyogan ko siya.

Dihang nakalingkod na ang maong lalake miorder dayon siya og beer lakip na ang sumsoman. Gikuha ko dayon ang iyang giorder ngadto sa counter ug sulod lamang sa pipila ka minutos nahibalik na ko sa nahimutangan niyang lamesa.

"Mahimo bang ubanan ko nimo dinhi, Miss?" Sa lalake pa dayong tutok nako. "Laay man god kaayo kung ako rang usa. Mobayad ko bisan pila basta ubanan ko nimo!"

Milingi ko sa manager sa Night Club nga naglingkod duol sa cashier ug nakita ko siyang misinyas pinaagi sa pagpataas sa kumagko sa iyang kamot nga nagpasabot sa iyang pag-uyon. Busa milingkod na lang sab ko sa lingkoranan tupad sa lalake.

"Ako si Ferdinand ug tawga lang ko'g Ferds!" Sa lalake pa dayong ipis sa beer ngadto sa duha ka mug.

"Ako sab si Emilita ug tawga lang ko'g Emily!" Tubag ko dayong pahiyom. Unya gidawat ko ang mug nga puno sa beer nga iyang gitunol nako. Ug nag-ingon kaming duha nga daw dugay nang managkaila. Unya nanayaw kami sa hawot nga musika binanwagan sa nagkidlapkidlap nga mga bombilya nga may nagkalainlain nga kolor. Nagmalipayon kaming duha. Matinahoron kaayo si Ferds kay bisan pa sa matang sa akong trabaho wala gayod siya mohikap kanako. Mirespeto gayud siya sa akong pagkababaye. Dili siya sama sa ubang mga kustomer nga kusog kaayong manghikap ilabi na kung mahubog na sa ilang giinom.

"Mopauli na ko, Ferds!'' Agda ko kang Ferds dihang nakita ko sa akong relo nga mag-ala una na sa kaadlawon.

"Sige...!" Tuaw ni Ferds dayong kuha sa iyang pitaka gikan sa luyong bulsa sa iyang karsones. Mitunol siya'g tagmanggatos kanako. "Bayari ang tanan kong atraso ug paaboton ko ikaw sa gawas. Ihatod ko ikaw sa gipuy-an mo!"

Sa gawas sa Night Club nanakay kami si Ferds sa iyang awto. Diha ko niya palingkora sa iyang tupad ug atubangang bahin sa sakyanan. Unya gipasiga niya ang suga sa awto ug gikuot ang iyang pitaka. Pagkatapos, mikuha siya'g salapi gikan niini.

"Imoha na kini, Emily!" Niya pa dayong tunol nako sa gikuptan niyang salapi. Apan nakalitan ko dihang nakita ko ang hulagway nga diha sa iyang pitaka. Gikuptan ko ang iyang pitaka ug gitutokan ang hulagway.

"Hulagway kini sa akong inahan, Ferds!" Nako pa dayong buhi sa pitaka ug nahulog kini sa paahan ni Ferds.

"K-kun mao kana ... i-ikaw diay ang akong anak!" Tuaw ni Ferds dayong gakos nako ug mipabati sa amahanon niyang pagmahal.

Ug luyo sa akong paghilak atubangan ni papa Ferds mipahiyom usab ang akong kasingkasing kay natuman ko ra gayod ang sugo sa masakiton kong inahan nga pangitaon ang akong amahan dinhi sa Sugbo. Misibat kuno si papa dihang nagsabak si mama nako kay nahadlok sa bahad ni lolo ug wala na gayud mobalik! (Kataposan)