Misyon sa kasingkasing

"Maayo gani kay wala pay laing nasayod mahitungod niini gawas kanako."

"Unsay buot mong ipasabot?"

"Wala pa nako tug-ani ang mga kauban kong polis nga nia ka sa akong possession. Nakahukom kong makigsulti una kanimo."

"Isipon kong dakong utang kabubut-on kanimo kun dili ka motug-an ngadto sa imong mga kauban mahitungod kanako."

"Wala ka ba diay plano nga mobalik ngadto sa imong mga ginikanan?"

"Sa pagkakaron, dili pa ko andam. Samtang anaa pa si Morris dili pa usab ako mobalik ngadto sa amo."

"Pero nabalaka na'g maayo ang imong mga ginikanan?"

"Nasayod ko. Pero mangita lang ko'g paagi nga mapuypoy ang gibati nilang kabalaka. Manawag ko nila aron pagpahibalo nga nia ko sa maayong mga kamot ug wala sila'y angay kabalak-an sa akong kahimtang."

Wala motingog si Bradley. Ang bugtong nahimo sa lalaki mao ra gayod ang pagtutok kaniya. Ingon sa gisukod niini ang kamatinud-anon niya sa iyang gipanulti.

"Karon nga nasayod ka na sa matuod, Bradley," ni Sandra pa pagkilab sa pipila ka daklit," anaa ra kanimo ang desisyon."

"Wala ko ikaw hisabti?" sukit ni Bradley.

"Mahimong mobiya ko karon dayon ning inyong panimalay kun mawad-an ka na og pagsalig kanako gumikan sa akong paglilong sa kamatuoran kanimo." (Sumpayan pa)