Misyon sa kasingkasing

"Walay nahimo ang akong mga ginikanan tungod kay gamhanan ang mga Sta. Ana didto sa among dapit. Mahimo nila ang tanan nga ilang gusto tungod sa ilang kuwarta. Ang negosyo sa akong amahan wala ra sa kumingking sa mga patigayon nga gipanag-iya sa mga Sta. Ana."

Wala motingog si Bradley. Nabantayan ni Sandra nga mitutok kini kaniya. Gipasagdan lang niya ang tinan-awan sa ulitawo nga miukob pag-ayo kaniya. Wala siya motan-aw niini. Nagduko siya.

"Napugos si Papa Fernan sa pagsanong sa kagustohan sa mga Sta. Ana nga ipakasal ako ngadto kang Morris," mipadayon pag-asoy si Sandra. "Apan wala ako mahigugma kang Morris. Dili ko makahimo sa pagpakasal sa tawo nga wala nako higugmaa mao nga nakahukom kong mokagiw gikan sa among dapit."

"Nganong nakahukom ka man nga anhi mopaingon sa Cebu sa imong paglayas?" Dugang pangutana ni Bradley.

"Tungod kay nagtuo ko nga maglisod na sila pagtultol kanako dinhi sa Cebu. Namasin sab ko nga igkita nako ang kanhi nakong klasmit ug higala nga si Ruth Sayson. Pero kun dili gyod nako siya igkita, mamahala nalang unta ko sa akong kinabuhi dinhi, mahilayo lang ko gikan kang Morris Sta. Ana."

"Maayo gani kay nagkaila kita sa barko," ni Bradley pa.

"Sa dihang nagkahimamat kita," ni Sandra pa," gibati ko nga usa ikaw ka anghel nga mikunsad gikan sa langit alang kanako. Nasayod kong makatabang ka gyod kanako. Nasayod kong dili mo ako pasagdan." (Sumpayan pa)