Gikasilagan ko ang kalibotan

Usa ka adlaw niana, nakigkita si Sonia kang Roy sa buhatan sa kapolisan. Naatol nga wala diha si Roy sa iyang pag-abot. Ang polis nga iyang gipangutana mitug-an nga migawas si Roy sa ilang buhatan dili pa lang dugay ug wala kini masayod kun asa mopaingon ang maong polis.

Apan wala magpalibak si Roy. Samtang padayon nga nakigsulti si Sonia sa polis nga iyang gipangutana, nahiabot kini.

“Good morning,” mitimbaya si Roy kaniya.

“Good morning,” mibalos siya’g timbaya.

“Kaganina ka ra?”

“Dili pa lang dugay.”

Ang polis nga maoy unang gikahinabi ni Sonia nananghid nga mopahilayo una kanila aron magkasulti sila’g maayo.

Si Roy misugyot nga aron magkasulti sila’g maayo, misulod sila sa usa ka pabugnawan ug mangisnak. Misanong si Sonia.

Didto sila mopaingon sa BQ Mall. Misaka sila sa ikaduhang andana diin didto nahimutang ang kan-anan.

“Unsay gusto nimong orderon?” Gipangutana si Sonia ni Roy.

“Ice tea lang ang ako,” ni Sonia pa. “Busog pa ko.”

Mibiya si Roy sa gipuwestohan nilang lamesa. Miduol kini sa counter ug mi-order og pagkaon. Pagbalik ni Roy, nagsapwang na kini sa tray nga gipatongan sa duha ka basong ice tea ug duha ka hiwa nga cake.

“Lisod gyud kaayo ang pagsulbad sa kaso sa pagpatay ni Helen Ogmoc, Sonia,” nagkanayon si Roy samtang nangaon sila. -- Sumpayan pa