Si Bugoy ug si Maru

Nag-abot sa tubaan ni Nang Pransing ang duha ka badlungon sa among baryo, nga si Bugoy ug si Maru. Si Bugoy naila sa ka maldidto, hambugero, isog ug barumbado. Samtang si Maru nabantog sa ka tikasan, kawatan, mangingilad, pilosopo ug hawod ka bugalbugalon. Gi-angga-an sila'g Bugoy ug Maru tungod sa ilang mga tagsatagsa ka kinaiya nga nihulagway sa ilang pagkatawo nga sukad pa sa ilang pagkabata ug hangtod na sa ilang pagdako.

"Ha! Inom diay kag tuba Ru?" pangutana ni Bugoy nga medyo mestiso na ang nawong tungod sa nainom nang tuba.

"Aw... inom man gani nang manok nga di kamao mangihi Goy, ako pa ba kahang tawo" kalmang tubag ni Maru nga dala insulto gamay.

Apan wa kabantay si Maru nga gikasuko diay ni Bugoy ang iyang tinubagan. Kalit nilupad ang usa ka kumo ni Bugoy paingon sa nawong ni Maru. Maayong pagkawingig sa nawong ni Maru.

"Dah .... mao nay angay nimong Maru-a ka...! hinanggaw kag tinubagan, dah .... wingig ka lagi" ni Bugoy nga isog kaayong nakahapos sa iyang kumo ngadto kang Maru.

Gusto pa untang usban ni Bugoy og sukmag si Maru apan wala na nakalahos kay dali namang kining nakahupo.

"A-a-ayyy ...a-ayaw intawon ana Goyyy .... akong gusto tagay, dili sumbagay" ni Maru nga ni ok-ok sa kilid bahin sa tindahan.

"Aw, lagi ba ... ayaw kog tubagag binuang kay basin mouli karong mag-ihap sa imong bun-og" ni Bugoy nga maisugon.

Way daghan langan si Maru. Para di siya mahitumpawak sa kabangis ni Bugoy, iya dayon kining gi-libre og inom. Mao kini ang dali niyang na-hunahunaan. Iyang paimnon si Bugoy aron di na siya makatilaw sa mga kinumo niini. Sayod na siya sa kasalbahis ni Bugoy kun mao nay masuko. Kay bisan pag iya ning suklan og sukmagay, wala gyud siyay bawot niini. Taas, dako ug naskulado si Bugoy. Samtang siya, morag baki sa saging ang ka-daot.

Nagkalami ang inom sa duruha. Hangtod nga abtag tunga sa gabii nag lango-lango na si Bugoy sa kahubog. Wala na kini panimuot nga nahapla sa lantay sa tindahan. Dinhi nibuhakhubak og katawa si Maru.

"Ha ha ha, sory ka nalang bugoya ka!!! kay di magsilbi ang imong ka-bugoy sa akong ka-maro. Ha ... ha .. ha.." ni Maru nga padayong nagkatawa.

Iya diay kining plano nga hubgon og maayo si Bugoy aron anhi siya makabawos. Siya'y nangumay og tagay sa ilang giinom nga tuba. Maong wala siya nahubog samtang si Bugoy maayong pagkahapla tungod sa ka hubog.

"Ha...ha...! karon Goy! Makabawos gyod ko nimong kagwanga ka!" ni Maru nga daling nikuot sa bulsa sa karsones ni Bugoy. Tulo ka matag gatos ang iyang nakuotan sa bulsa. Nitingsi si Maru.

"He he he ... kini da kwarta ... na ni..." ni Maru nga nagkumkom sa kwarta ni Bugoy.

Wa natagbaw, iya pa kining gihuboan sa tanang sapot. Maoy iyang gusto nga inig mata ni Bugoy usa na kini ka burles king.

Pagka buntag sayo. Maoy nabati ni Bugoy ang buhakhak sa mga tawo sa merkado nga nilanog sa iyang palibot. Nagpangusmod si Bugoy. Dali niyang gikumkom ang iyang buhi nga wala nay tabon. Igo nalang niyang gilingolingo ang iyang ulo. Wala gyud nagsilbi ang iyang kabugoy sa kamaro ni Maru. (Kataposan)