Gikasilagan ko ang kalibotan

“No,” matud ni Ethan. “Ayaw kana buhata, Sonia. O-okey, mosugot ko sa gusto mong mahitabo. Di na ko maghisgot bahin sa gugma.”

“Maayo kun mao kana. Kini maoy timan-i Ethan, nga dili ko motuo nga adunay gugma. Anaa lang kana sa dila sa tawo apan wala sa kasingkasing hinungdan nga daghang mga binuhat ang naghilak ug naalaot tungod sa gugma. Ug usa na niini ang akong manghod.”

Wala makatingog si Ethan sa iyang atubangan. Wala gani kini makaharong sa hait niyang tinan-awan.

Sukad niadtong maong hitabo wala na gayod maghisgot si Ethan bahin sa gugma sa higayon nga magkuyog sila si Sonia. Kanunay silang magkuyog sa pagpangapkap og balita sanglit si Ethan man maoy photographer sa dalaga. Nasabot ni Sonia nga naglikay si Ethan nga magkalalis sila.

Padayon nga gi-follow-up ni Sonia ang kaso sa kamatayon ni Helen Ogmoc, ang modelo nga gipatay ug gilabay ang patay’ng lawas niini didto sa Baguio Drive nga nahisakop sa dakbayan sa Tagbilaran. Pero nagpabiling blangko ang kapolisan bahin sa posibleng motibo sa pagpatay sa modelo.

Gumikan sa pagpunay og adto ni Sonia sa presinto sa kapolisan, nasuod ni Sonia si PO1 Roy Cleopaz. Gaan kaayo ang kabubut-on ni Sonia ngadto ni Roy. Bisan tuod kun nailhan siya nga manhater sa BBN Publications apan wala kini magpasabot nga hingpit na gayod siyang nawad-an og respeto ngadto sa mga lalaki. Maantigo usab siyang morespeto niadtong mga lalaki nga sa iyang paniid dili maantigong mo-take-advantage kaniya. -- Sumpayan pa