Misyon sa kasingkasing

“Nagsige’g ring ang imong cellphone kagabii bisan tunga nang gabii,” ni Bradley pa nga misal-ot sa panagsulti human sa taudtaod nga pagpakahilom. “Kinsa ba kadtong nanawag?”

“M-mga tawong walay lingaw,” ni Sandra pa.

Nakabati diay si Bradley sa pagpunay og bagting sa iyang cellphone kagabii. Nagtupad ra man gud ang kuwarto nila ni Bradley. Bungbong ray nag-uwang sa tagsatagsa nila ka lawak.

“Nganong wala man to nimo tubaga?” Dason nga pangutana ni Bradley.

“Dili kadto importante,” matud ni Sandra. “Ambot, ginindotan tingali silang namati sa ring back tone sa akong cellphone maong ila kining gikalingawan sa pagpabagting.”

Apan ang tinuod, sila si Morris Sta. Ana ug Mr. Fernan Diolan ang nagpunay og panawag sa iyang cellphone kagabii. Wala gayod niya tubaga ang ilang mga tawag aron pagseguro nga dili sila masayod kun hain siya karon.

Nahunong lang ang pagbagting sa iyang cellphone sa dihang iya kining gi-off. Gipawong niya ang iyang cellphone tungod kay dili siya makatulog. Saba kaayo kini nga nagsige og bagting.

“Abi ko’g mga admirer nimo kadtong nanawag,” sagol komedya ang sinultihan ni Bradley.

“Kun admirer pa,” ni Sandra pa, “ngano man kahang dili nako tubagon? Basin diay kun magkasinabot mi.”

Wala na motubay si Bradley sa iyang gisulti.

Gitibawas nila ang pagpangaon. -- Sumpayan pa