Misyon sa kasingkasing

Wala pa makatulog si Sandra sa paghibalik ni Bradley gikang naghatod kang Debra. Gidisturbo ang iyang pagpahuway sa mga tawag sa iyang cellphone. Nagbanosbanos lang pagpanawag sa iyang cellphone sila si Morris Sta. Ana ug Mr. Fernan Diolan, ang iyang amahan. Apan wala gayod niya tubaga ang ilang mga tawag. Nasayod na siya sa ilang tuyo kaniya.

Migawas siya sa iyang lawak aron pagtubag sa sugo sa lawas. Miadto siya sa banyo. Sa dihang mobalik na unta siya sa iyang lawak, nakita niya si Bradley nga maoy paggawas sa kuwarto niini. May tualyang gisagbay sa abaga niini.

“Wa ka pa diay matulog?” Sukit ni Bradley.

“Nakatulog na unta,” namakak siya. “Pero gipukaw ko sa sugo sa lawas.”

Nakapahiyom si Bradley.

“Kaganina ka rang nahiuli?” Nagpakaaron-ingnon si Sandra nga wala makamatikod sa paghiabot sa ulitawo.

“Dili pa lang dugay,” maoy tubag. “Maligo una ko kay giinitan ko.”

“Guwapa man diay ang imong girlfriend,” ni Sandra sa mikagalkal nga tingog.

“Salamat sa komplimento,” ni Bradley.

“Do you really love her?” wala sa hunahunang pangutana ni Sandra.

Nahitutok si Bradley kaniya. May kahibulong nga milutaw sa panagway sa ulitawo. Natugkad ni Sandra kun ngano. Wala magdahom si Bradley nga makapangutana siya’g ingon niadto. -- Sumpayan pa