Managkaluha kaha sila?

May mga tawo ngananaglahi ang kagikan apan nganong pareho ang ilang panagway? Ingon gayod kaha niini ang tawo dihang gikulit siya sa kinaiyanhong kamot? Bisan gani kadto si Presidente Erap, daghan mga tawo nga pareho sa iyang dagway. Kun ang tawo mao ang dagway sa Diyos, nganong naa may ngil-ad ug nindot nga nawong? Mao kini ang dugokan niini nga sugilanon.

Si Gina, gihimugso nga walay ginikanan kay ang nahimo niyang inahan mao si Tiya niya Auring. Maayo na lang nga ang iyang Tiya Auring, usa usab ka dalaga ug maoy mipasalig nga moalima kaniya.

Si Auring usa ka dalagang gulang, niadtong batan-on pa kini, dunay hinigugma nga Mando ang ngalan apan dihang gitakda unta ang ilang kasal, milakaw kini sa wala nay pagbalik ug hangtod karon wala na gayod igdungog.

Ambot unsa kaha ang hinungdan. Mga luha intawon ang mibiaw sa mga mata sa iyang iyaan. Gusto na man gani unta kining tapuson niini ang kinabuhi. Maayo na lang sa pagnaya-naya sa iyang mga ginikanan, wala mahinayon ang daotan niyang laraw. Mao kadto nga si Tiya niya Auring naluwas gikan sa kamatayon.

Si Gina ubos sa pagmatuto sa iyang iyaan, mitungha sa elementarya ug tungod lagi sa kawad-on wala gayod makatungha sa high school. Gibati niya ang kaibog niadtong iyang mga klasmets nga mipadayon pagtungha sa high school.

"Pasinsiya na lang, Gina kun dili ka makatungha sa high tungod kay pobre man kita," matud sa iyang iyaan. "Maayo man kadtong imong mga klasmet kay mga adunahan man sila."

"Kapait ba gayod sa kinabuhing kabos, Tiya," pulong ni Gina nga kahilakon kay naanugonan nga dili siya makatungha.

Mao kadto nga nagkalingaw na lang si Gina pagtabang sa iyaan pagtinda og pagkaon sama sa puto, bibingka, utanon basin pinaagi niini, makapalit sila’g bugas matag adlaw.

Nahimo si Gina nga kaabag sa iyaan. Bisan sa kalinghod pa sa iyang panuigon, nakat-on si Gina sa pagnegosyo hangtod nga nahimo siyang dalaga.

Daghan ang gibati og kaibog kang Gina. Si Gina, pulong pa sa iyang magdadayeg, maanyag ug daw usa ka hapon nga nahisalaag sa ilang dapit.

Matud pa sa mga tawo diha sa ilang barangay kinsa nakakita na sa Hapon niadtong ikaduhang gubat sa kalibotan, si Gina daw Haponesa nga nahisalaag sa ilang dapit. Tungod niini, daghang mga ulitawo ang gibati og paghigugma kaniya.

"Gin, kun dawaton mo lang ang akong gugma, bisan ugma dayon, magpakasal kita," matud ni Andoy ang usa sa iyang maghahalad. "Busa, kun mahimo, ayaw na ako paantosa."

"Bata pa ako, Doy," tubag sa dalaga. "Pangita na lang og lain kay hangtod karon wala pa sa akong hunahuna ang mahigugma og lalaki."

"Tinuod batan-on ka pa, Gin. Magpaabot ako sa imong pag-abot sa pagkahingkod. Basta, angay mong masayran, dili na ako mahigugma pa sa lain gawas kanimo, Gin."

Daghan pang mga lalaki ang naibog kang Gina apan silang tanan, daw wala makapapitik sa kasingkasing sa dalaga. Daw nahisama silang tanan sa usa ka tawo nga nagdughit sa bulan.

Ang iyang iyaan nga si Auring, mitambag kaniya nga si Andoy usa ka lalaki nga buotan busa alang kaniya, maayo usab si Andoy nga iyang mabana. Apan, igo lang nga miyam-id ang iyang Tiya Auring kay wala pa gayod siya batia og bisan kinsa.

Usa ka adlaw, dunay mga turistang Hapon ang nahisuroy sa ilang dapit kaha aron pagtan-aw og unsa ang kanindot sa maong barangay. Usa ka Hapon ang nakadapit sa pagtagad sa mga tawo sa ilang palibot. Bisan si Gina, nadapit ang iyang pagtagad sa usa   ka Hapon nga turista nga pareho ang dagway kaniya. Ang Hapon mitutok kaniya, miduol ug nakighinabi kaniya.

"Hey, you girl!" pulong sa Hapon sa putol-putol nga Iningles. "Are you a Japanese woman?"

"No, Sir! I am a Filipino," tubag usab ni Gina sa labaw pang putol-putol nga Iningles. "Why do you look like a Japanese?"

"Why are we the same in face?"

"I don't know, Sir?"

Nagkasinabot sila si Gina ug ang Hapon bisan kun dili pareho ang ilang pinulungan. Gihatagan si Gina sa Hapon og kuwarta ug mipasalig kini inigbalik niini sa Pilipinas hangyuon niini usab ang iyang mga ginikanan nga agnihon si Gina nga adto mopuyo sa Japan. Nahimuot man gud ang Hapon nga sa usa ka dapit sa kalibotan, dunay tawo nga daw kaluha kaniyag panagway.

Kun matinuod ang gisulti sa Hapon nga mobalik kini sa Pilipinas aron makigkita pag-usab kang Gina, magminyo kaha silang duha? Wala pa kita masayod. Apan nakita nga matinud-anon ang Hapon dihang mihatag og dakong kuwarta aron magamit ni Gina sa iyang negosyo ug sa pamilya. (Kataposan)