Gikasilagan ko ang kalibotan

Gula 28

“Awaaw ang maong dapit, Sonia. Talagsa ray tawo nga makaabot didto nga walay sakyanan. Gawas pa, kuryoso ra usab siya kaayo kay sa akong bahin, kun makakita ko’g plastic bag nga gilabay sa usa ka hilit nga dapit, dili na ko magtagad niini. Kay ang unang moabot sa akong hunahuna mao man nga basura ang sulod sa plastic bag. Pero lahi ang imong misteryosong caller. Ingon sa nasayod siya nga patay’ng lawas sa tawo ang sulod sa plastic bag mao nga nanawag siya kanimo.”

Nahilom si Sonia. Gihinuktokan niya ang gisulti ni Roy kaniya. Gipalugdang niya kini sa iyang hunahuna.

Taudtaod gayod nga nahiunlod si Sonia sa halawom nga pagpalandong.

“Ug nia pay lain kong pangagpas, Sonia,” matud ni PO1 Roy Cleopaz.

“U-unsa kana, Roy?” Pakitubod ni Sonia.

“Dako gyud ang posibilidad nga nakaila kanimo ang misteryoso mong caller, whether siya ang mamumuno o dili.”

“Nganong nakasulti ka man niana?”

“Tungod kay ikaw man gayod ang iyang gitawgan. Mahimo man unta nga modirekta siya’g tawag sa buhatan sa kapolisan aron pagpahibalo sa maong hitabo. Dili ba nga mao man gayod kana ang sagad nga buhaton sa uban?”

“Posibleng husto ang imong pangagpas, Roy, nga malagmit nakaila kanako ang misteryoso kong caller ug nasayod siya sa akong trabaho. Dili tsamba ang iyang pagtawag kanako. Nakaila siya sa akong ngalan ug nasayod siya nga usa ako ka reporter.” -- Sumpayan pa