Gikasilagan ko ang kalibotan

Gula 27

“Wa na ba manawag pag-usab kanimo ang misteryosong caller nimo?”

“Wa na. Nagpaabot kong motawag siya pag-usab kay ako siyang pasalamatan. Pero wa na gyud siya manawag nako.”

“Posibleng may misteryong nagpaluyo sa kamatayon ni Helen Ogmoc, kun maoy basehan ang imong pamahayag, Sonia.”

“Nganong nakasulti ka man niana, Roy?”

“Tungod kay sa akong analysis, ingon sa nasuheto ra kaayo ang maong tawo sa pagkahitabo sa krimen. Ug ingon sa nakaila usab siya kanimo.”

Mikunot ang agtang ni Sonia nga mitutok kang Roy. Wala siya makaagpas sa balighot sa lohika nga gipadayag niini kaniya.

“Nagtuo ko, Sonia, nga ang nanawag kanimo may dakong kasayoran mahitungod sa nahitabong krimen. Tingali, nakasaksi siya sa pagkahitabo sa krimen ug nahadlok lang nga mopaila tungod kay iyang gipanalipdan ang seguridad sa iyang kinabuhi. Posible sab nga siya mismo ang naghimo sa krimen.”

Nahitutok na usab si Sonia kang Roy.

“Suheto ra man gud siya kaayo sa panghitabo,” mipasabot si Roy. “Nagtuo ko nga si Helen Ogmoc wala patya sa dapit diin didto siya nabangalan. Gilabay lang siya didto human patya. Unya, nganong ingon sa nasuheto man kaayo ang misteryoso mong caller sa nahitabo. Buot bang ipasabot nga sukad sa dapit nga nahitaboan sa krimen hangtod sa dapit nga gilabayan sa patay’ng lawas sa biktima gisundan niya ang mamumuno.”

“Dili kana maoy akong pangagpas, Roy. Nagtuo ko nga nakakita lang siya sa paglabay sa patay’ng lawas sa biktima didtong dapita. -- Sumpayan pa