Gikasilagan ko ang kalibotan

“Nganong interesado ka man kaayo mahitungod sa kaso ni Helen Ogmoc?” Gipangutana siya ni Roy pagkilab sa pipila ka daklit.

“Tungod kay nakahatag kanakog misteryo ang iyang kamatayon,” laktod nga tubag ni Sonia.

Nahitutok si PO1 Roy Cleopaz kang Sonia Atienza. Nakasabot ang dalaga nga wala kaayo makatugkad ang polis sa iyang gipamulong.

“Sa wala pa namo mabangali ang patay’ng lawas ni Helen Ogmoc,” nagkanayon si Sonia, “may nanawag kanako sa telepono nianang pagkakaadlawon. Wala siya magpaila sa iyang kaugalingon. Miingon lang siya nga gusto siyang makatabang sa akong career.”

“Unya?” pakitubod ni Roy.

“Iya kong giingnan nga moadto sa Baguio Drive aron makakuha ko’g nindot nga balita,” dugang ni Sonia. “Nagtuo ko sa sinugdan nga nagkomedya lang ang maong misteryosong caller. Pero akong natimbangtimbang nga I have nothing to lose kun tumanon nako ang iyang gisulti. Mao nga kuyog sa akong photographer, miadto kami sa Baguio Drive. Tuod man nakita namo ang patay’ng lawas ni Helen Ogmoc nga gilabay didtong dapita.”

Miyango-yango si Roy sa iyang gisulti. Mipitokpitok ang mga mata sa polis nga ingon sa may gihunahuna.

“Tungod lagi kay ako'y unang nakakuha sa maong impormasyon,” ni Sonia pa, “ako ang may mas komprehensibong report mahitungod sa kamatayon ni Helen Ogmoc. Ug wala masayop ang misteryoso kong caller. Nakatabang gayud kini sa akong career isip taga print media.” -- Sumpayan pa