Gikasilagan ko ang kalibotan

Gula 23

Gibati ni Sonia ang tumang kasubo. Sakitan gayod siyang maghandom sa kamatayon ni Anita. Pinangga niya ang iyang manghod. Ang nahitabo kang Anita maoy nakapasamot sa kasilag niya sa mga lalaki.

Nagdumot siya kang Froilan, ang lalaki nga maoy nakaingon sa kaalaotan ni Anita. Nagbahad siya’g panimalos ngadto sa maong lalaki. Mao nga kanunay na siyang magdala og armas nga gisulod sa iyang shoulder bag. Sa higayon nga ikasugat niya si Froilan, iya kining pusilon aron ikapanimalos niya ang kamatayon sa pinangga niyang manghod.

Lisensiyado hinuon ang armas ni Sonia. Nagbaton siya’g armas sukad nga ingon sa nagkagrabe ang hulga sa kinabuhi sa taga media. Risgo kaayo ang iyang trabaho. Mao nga bisan babaye siya, nagbaton gayod siya’g armas.

Pero kun magkatagbo ang mga dalan nila ni Froilan, ang maong lalaki maoy posibleng unang makatilaw sa bala sa iyang pistola.

Naputol ang paghanduraw ni Sonia sa dihang may sakyanan nga mihunong sa tungod sa balay nga iyang gipuy-an. Milili siya sa may bentana aron pagsuta kun kinsa ang nahiabot.

Sa dan-ag sa siga sa sugang dagitabnon sa poste sa duol, naklaro ni Sonia kun kinsa ang nahiabot. Dili mahitabong masayop siya, si PO1 Roy Cleopaz gayod ang nahiabot.

Nag-buzzer si PO1 Cleopaz. Gitan-aw ni Sonia ang relo sa bungbong. Pasado alas siyete pa lang sa kagabhion. Nakahukom siya nga pasudlon si PO1 Cleopaz kay basin importante kaayo ang tuyo niini kaniya. -- Sumpayan pa