Gikasilagan ko ang kalibotan

Gula 22

“Dugay ka man nga miabot. Gawas pa, wa na kinahanglana nga magdala pa ko’g photographer. May hulagway na man kita kang PO1 Roy Cleopaz.”

Wala na motingog si Ethan.

Milahos siya sa news room aron sulaton ang balita nga iyang nakuha. Dili kaayo bug-at ang iyang estorya tungod kay wala pa may development ang kapolisan mahitungod sa kaso ni Helen Ogmoc.

“Sundi gyud kining kasoha Miss Atienza,” nagkanayon si Mr. Johnny Orioque sa dihang gi-submit na niya ang iyang manuskristo ngadto niini. Kinahanglang komprehensibo ang atong makuhang report niini.”

“Sa pagkakaron,” ni Sonia pa, “ako lang unang gi-sensationalize ang akong estorya, Sir, kay wa pa may development ang imbestigasyon sa kapolisan.”

“Okey lang kini. At least, may follow-up story kita sa maong kaso.”

Paggawas ni Sonia sa BBN Publications nianang pagkahapon, nakahukom siyang mag-malling. Misakay siya’g multicab gikan sa Plaza Marcela paingon sa Island City Mall sa Dao. Wala siya’y nahunahunaan nga paliton. Gusto lang siyang magrelaks human sa pressure sa trabaho sa news room.

Gikan sa Island City Mall, mipauli na siya sa iyang gipuy-an. Maoy misugat kaniya ang kamingaw sulod sa balay. Nag-inusara na man lang gud siya sukad nga namatay ang iyang manghod nga si Anita.

Samtang naglingkod sa sopa sa sala, wala kalikayi ni Sonia nga mopasigpat ngadto sa pultahan sa lawak kanhi sa iyang manghod. Serado na kini ug nagmingaw. Kay lagi, wala na man ang iyang manghod. -- Sumpayan pa