Misyon sa kasingkasing

Gula 15

Human sa pamahaw misulod si Sandra sa iyang lawak ug mipahuway. Gibati niya ang pagduka. Lapas na man gud sa tungang gabii nga nangatulog sila si Bradley kagabii sa barko. Naglami ang ilang panagsulti.

Nakatulog gayod si Sandra. Udto na sa dihang nahigmata siya sa sunodsunod nga pagtuktok sa pultahan. Si Bradley ang nasugat sa iyang panan-aw.

“Maniudto na ta,” agda sa ulitawo.

Wala na siya motubag sa ulitawo. Misunod na siya niini nga mipaingon sa komedor. Sa lamesa, nakita niya ang lamian nga mga pagkaon.

“Kaon na,” ni Bradley pa dihang nakapahimutang na sila sa tagsatagsa ka lingkoranan.

“Si Nang Diday diay?” Gipangita ni Sandra ang inahan ni Bradley.

“Milakaw,” maoy tubag. “Wala siya adlaw’ng tanan dinhi sa balay. Nagdumala man gud siya’g restaurant sa downtown. “Tua siya didto kada adlaw.”

“Diay ba?” Wala sa hunahunang bungat ni Sandra. “Kinsa man diay naghikay niining maong mga pagkaon?”

“Ako,” nagkatawang mitubag ang ulitawo.

Wow! Nakatuaw siya sa hilom. May lain na usab siyang nadiskubrehan kang Bradley. Responsable kini nga pagkalalaki. Makamao sa daghang mga bulohaton. Sa hilom nakadayeg siya sa ulitawo. -- Sumpayan pa