Gula 21
“Dili ba posibleng rape ang motibo sa pagpatay kang Helen Ogmoc? Misukit si Sonia.
“Lisod ang pagsagop nianang maong teyoriya, Miss Atienza, tungod kay base sa resulta sa paghiling sa medico legal, intact ang pagka-babaye sa biktima. Wala kini hilabti.”
Ang sunod nga gipakigkitaan ni Sonia aron kuhaan og impormasyon mao ang mga ginikanan sa biktima. Niining tungora, gihaya pa sa panimalay sa mga Ogmoc ang patay’ng lawas ni Helen.
“Wala gyud kami ideya kun unsay hinungdan sa kamatayon sa among anak, Ma’am”, nagkanayon si Mr. Ogmoc.
“Tua na siya magkanunayan sa Manila,” misal-ot usab si Mrs. Ogmoc, “mao nga wala kaayo kami masuheto sa iyang kalihokan didto. Bag-o lang siyang mipauli aron mobakasyon. Ug kini pa hinuon ang nahitabo kaniya.”
Wala na makapugong si Mrs. Ogmoc sa paghilak sa atubangan ni Sonia.
Nasuta karon ni Sonia nga siya ug ang kapolisan nag-atubang sa blangkong bungbong mahitungod sa pagsulbad sa kaso sa kamatayon sa modelo nga si Helen Ogmoc.
Human makigkita sa mga ginikanan ni Helen Ogmoc, si Sonia mibalik na ngadto sa buhatan sa BBN Publications.
“Diin ka man?” gisugat siya ni Ethan.
“Sa presinto sa kapolisan,” tubag ni Sonia. “Nag-follow-up ko sa kaso sa kamatayon ni Helen Ogmoc.”
“Nganong wa man ka maghuwat nako?” -- Sumpayan pa