Misyon sa kasingkasing

Gula 14

“Di ko mauwaw, Manang,” gisakyan ni Sandra ang mood sa inahan ni Bradley. “Wa ra ba koy mga ginikanan dinhi.”

“Unsa may plano mo karon?” Misal-ot si Bradley. “Pangitaon mo pa ba si Ruth?”

“Ambot lang kaha niini,” ni Sandra pa. “Asa ko man usab siya pangitaa?”

“Di man kana problema. Ipasibya nato sa mga istasyon sa radyo aron masayod si Ruth nga nia ka sa Sugbu ug nagpangita ka kaniya.”

“A-ayaw lang tingali, uy,” ni Sandra pa. “Mosikat man sab ta niana.”

Apan hapin lang ang maong katarongan niya sa matuod niyang tumong. Ang tinuod, dili siya gustong masibya sa radyo ang iyang pagpangita kang Ruth tungod kay dili siya gusto nga may laing masayod nga ania siya sa Sugbu.

“Anyway,” ni Bradley pa pagkilab sa pipila ka daklit. “Kun bakasyon lang ang imong tuyo, di na man tingali kinahanglan nga pangitaon pa nimo si Ruth kun wa kay importanteng tuyo niya. Puyde man nga anhi ka na lang gyud sa bay samtang ganahan ka pang moistar dinhi sa Sugbu.”

“Daghang salamat, Bradley.”

“Nganong ang Sugbu man gyud ang napili nimong bakasyonan, Inday,” sukit ni Nang Diday, “nga wa ka pa man masuheto dinhi ug wa usay kadangpan?”

“Hilig man gud ko sa adventure, Manang,” maoy tubag. “Ganahan kong magsuroy-suroy sa dapit nga dili nako sinati. Pang-experience lang gud.”

Kadiyot nga mipatunga kanila ang kahilom.

“Maayo gani kay nagkaila kami si Bradley sa barko,” si Sandra ang miwakli sa kahilom. “Kun wa pa, mapugos gyud ko’g pangabang og kaistaran.” -- Sumpayan pa