Sa presinto...
Nagpaila si Sonia ngadto kang PO1 Roy Cleopaz. Pero daan na diay kining nakaila kaniya. Karon lang sila nagkahimamat sa personal. Nakaila na usab siya kang PO1 Cleopaz kay usa man kini ka celebrated nga polis sa dakbayan sa Tagbilaran. Gisugdan dayon niya pag-interbiyu ang polis.
“Di pa kami makahatag og teyoriya, Miss Atienza,” ni PO1 Cleopaz pa. “Maghimo pa kami’g imbestigasyon. Wala pa gani namo makuha ang identification sa maong babaye.”
Wala gayod mobiya si Sonia sa presinto samtang wala pa mopagawas og pamahayag ang kapolisan kalabot sa patay’ng lawas sa babaye nga ilang nabangalan didto sa Baguio Drive. Pasado alas diyes sa kabuntagon mipagawas na og statement si PO1 Roy Cleopaz. Mas komprehensibo ang mga detalye nga nakuha ni Sonia. Nailhan na ang babaye nga gipatay. Siya si Helen Ogmoc, usa ka modelong Bol-anon. Wala pay ideya ang kapolisan kun unsay motibo sa suspek sa pagpatay sa maong babaye.
Pagkaugma, nagbansiwag ang banner story sa Bantay Balita mahitungod sa pagpatay sa modelo nga si Helen Ogmoc. Nalipay pag-ayo ang editor-in-chief sa maong pamantalaan nga si Johnny Orioque kay nahisama sa bibingka sa Mandaue nga init kaayo nga gikuptan ang ilang pamantalaan.
Nalipay usab si Sonia. Siyempre, siya gud ang nakakuha sa maong balita. Apan giisip niyang dakong utang kabubut-on ngadto sa misteryoso niyang caller ang maong kalamposan. Gusto niyang pasalamatan ang maong tawo kun magpaila lang kini kaniya. -- Sumpayan pa