Misyon sa kasingkasing

Gula 12

Mitingog ang message alert tone sa iyang cellphone. Gikuha niya kini gikan sa iyang shoulder bag. Gisusi niya kun kinsay nagpadala og text kaniya. Si Mr. Fernan Diolan diay, ang iyang amahan.

Iyang gibasa ang text sa iyang amahan. Nagsusi kini kun hain siya. Nasayod na ang iyang amahan sa iyang paglayas.

Wala niya tubaga ang text sa iyang amahan.

Paglabay sa pipila ka daklit, mitingog ang incoming call alert sa iyang cellphone. Milutaw sa gamay nga screen sa cellphone ang ngalan sa iyang amahan isip maoy tag-iya sa numero sa cellphone nga nanawag. Wala kini niya tubaga. Gipasagdan niya kining magpadayon pagbagting.

Makapila magsubli-subli pagbagting ang iyang cellphone apan wala gayod kini niya tubaga. Dili siya buot makigsulti sa iyang amahan.

Sa kusina, gipakigsultihan ni Bradley si Nang Diday mahitungod sa pagpuyo ni Sandra sa ilang balay.

“Ikaw gyung anaka ka,” ni Nang Diday pa nga may gikurikuri. Naghikay kini sa ilang pamahaw. “Tingalig kinsa kanang babayhana, ha?”

“Hinaya kanang tingog nimo, Ma,” badlong ni Bradley. “Tingalig makadungog si Sandra.”

“Ngano bang gidala mo man kanang babayhana dinhi?”

“Naluoy ko niya, Ma. Miingon man gud siya nga wa siya’y kaabtan dinhi. Nabalaka ko nga tingalig may daotang mahitabo kaniya kun ako lang siyang pasagdan. Nahibaw ka na bitaw dinhi sa ato nga daghan kaayong mga badlongon. Pero dili man kuno siya magdugay dinhi. Kun matultolan na niya ang gipuy-an sa iyang higala dinhi sa Cebu, mobiya na siya dinhi sa ato.” -- Sumpayan pa