Ang gugma ni Noy Kadyo

Nalingaw ko sa pagtan-aw sa gisunod kong telenobela sa telebisyon sa among sala. Alas nuybe pasado na sa kagabhion. Ako nalang usa ang nagtan-aw sa salida kay ang akong mga ginikanan nanulod na sa ilang lawak aron mangatulog. Ang duha nako ka manghod tua na sab sa ilang lawak.

Nauknol ko sa akong gilingkoran dihang nadungog ko ang kusog nga tingog ni Lucia. Morag duna siya’y gikasab-an. Nagdali kong midungaw sa bentana nga nag-atubang sa balay nila ni Lucia. Silingan namo sila, hapit na lang magsikit ang among balay.

Maoy nabantang sa akong panan-aw si Lucia nga nanighawak sa atubangan ni Noy Kadyo.

"Unsa ka bang sulithan, Noy! Katiguwang na nimo unya mamisita ka nako? Di ba giingnan na man tika nga kadakong uwaw nga mangulitawo ka nako. Anak na lang gani ko nimo tungod sa kadako sa imong edad kay kanako!"

Nahikatawa ko nga nagtan-aw kang Lucia nga hapit nalang palayason si Noy Kadyo nga diha sa ilang tugkaran. Wa intawon makadayon ang tigulang sa panimalay nila ni Lucia kay gisugat man kini ni Lucia sa ilang tugkaran.

Magul-anon si Noy Kadyo nga mibiya. Nagbagutbot si Lucia nga misulod sa ilang balay. Wa nako ganahing mipadayon pagtan-aw sa salida sa telebisyon. Gipalong ko kini. Misulod ko sa akong lawak aron matulog na.

Pagka ugma, nakigsulti ko kang Lucia. Kauban kami sa trabaho sa munisipyo sa among lungsod. Pulos kami nakahuman sa kursong komersyo.

"Isoga nimo kagabii, uy, Lucia. Kahasmagon ka man kang Noy Kadyo."

"Di uroy mauwaw tiguwanga, Ester. Nagkita kami sa merkado niadtong miaging adlaw. Gisultihan ko niya nga mamisita siya sa balay. Gibalibaran dayon nako siya. Hunahunaa lang god, saysinta kapin na ang iyang edad, ug ako bayinte sayis pa lang."

"Wa man say problema, Lucia. Dalaga ka ug biyudo si Noy Kadyo." Mikatawa ko. Gisulugsulog ko si Lucia.

Nahikatawa na lang usab si Lucia. Nakasabot siya nga gisulogsulog ko lang siya.

Usa ka buntag, sayo kong mimata. Nakita ko si Nang Lorie nga inahan ni Lucia nga nanilhig sa ilang tugkaran. Malipayon kaayo ang tiguwang biyuda. Nagkantakanta pa. Dugay na siyang nabiyuda ug bugtong anak si Lucia.

Paggawas ko sa trabaho sa munisipyo nianang pagka hapon, milargo ko sa merkado sa among lungsod. Namalit ko alang sa lutoong sud-an sa among panihapon. Nakita ko si Noy Kadyo nga malipayon samtang namalit sab og sud-anon. Giduol ko siya.

"Ah, kamalipayon man." Gipahiyoman ko ang tigulang dihang milingi siya nako.

"Ingon gyod ani kun mahigugma, Day Ester."

Wa ko na lang siya tubayi. Nagdali kong mipauli kay lutoon ko pa ang isda nga akong gipalit.

Pagka buntag, naigking ko sa akong higdaanan sa kusog nga hilak ni Lucia. Nahibulong ko. Nagdali kong migawas sa akong lawak. Sayo pa ang kabuntagon. Mikanaog dayon ko ug giadto si Lucia sa ilang balay. Didto na sab diay ang akong mga ginikanan nga nabalaka sab sa pagtiyabaw ni Lucia. Migakos si Lucia nako.

"Ester, si Nanay Lorie, milakaw kagabii. Nagbilin siya’g suwat para nako. Mikuyog siya kang Noy Kadyo. Nagtaban sila."

Igo ko na lang gihapuhap ang bukobuko ni Lucia. Nasayop diay siya sa iyang gituohan. Dili diay siya ang gustong pamisitahan ni Noy Kadyo, kondili si Nang Lorie diay. Si Nang Lorie diay ang gihigugma ni Noy Kadyo. (Kataposan)