Gula 11
Nakaingon siya sa hilom nga wala’y klaro ang impormasyon nga gihatag sa misteryosong caller kaniya. Nagduhaduha siya pagtuman sa gisulti niini. Apan iya pud nga natimbangtimbang nga wala’y mawagtang kaniya kun adtoon niya ang maong dapit. Hinuon, makadugang kini sa iyang kredibilidad isip inilang reporter sa Tagbilaran City kun makakuha siya’g dakong estorya sa dapit nga gitudlo sa misteryosong caller kaniya.
Diha’y misantop sa iyang hunahuna. Dihadiha gipunit niya ang awditibo ug midayal. Gitawagan niya si Ethan Herra sa gipuy-an niini. Nasayod na siya sa cellphone ug landline number ni Ethan tungod kay iya kining gikuha kagahapon. Importante man gud nga magkasayranay sila sa ilang mga contact number tungod kay sila man ang mag-partner sa trabaho.
Nagpadayon pagbagting ang telepono didto sa pikas linya. Taudtaod diha’y mitubag, usa ka lalaki nga klaro kaayo sa tingog nga gikan pang natulog ug may nahibilin pang duka niini.
“Ethan Herra?” Naneguro si Sonia kun si Ethan ba gyud ang nakatubag.
“Yes,” tubag sa lalaki didto sa pikas tumoy sa linya. “Kinsa ni?”
“Si Sonia Atienza.”
“Uy, Miss Atienza. Unsay akong ikaalagad kanimo? Nganong nanawag ka man kanako niining mga orasa?”
“May importante kong tuyo nimo?”
“U-unsa kana?”
“Pik-apa ko diri sa akong gipuy-an karon dayon. May adtoon kita. Unya na lang pangutikuti kun asa ta. Maghuwat ko nimo diri sa akong gipuy-an.” -- Sumpayan pa