Kausaban

Si Jessie gihukman sa Korte Suprema nga mabilanggo diha sa Bilibid Prison sa Muntinlupa sa tibuok niyang kinabuhi gumikan sa daghan nga krimen nga iyang nabuhat.

Naglakip niini ang pagpangilad, pagpanglabni, kawat, lugos, pagpayuhot sa drugas ug patay. Si Jessie nga dili motuo og Ginoo nailo sa iyang mga ginikanan sa dihang nagpangedaron pa lang siya og tulo ka tuig.

Ang iyang mga ginikanan nga sila si SPO4 Polberto ug SPO1 Rubi gipatay sa mga drug lords gumikan sa ilang kusganon nga kampanya batok sa gidiling drugas.

Gumikan sa tumang kalooy nga wala nay ginikanan, si Jessie gisagop sa paryente ni Rubi nga si Adelyn nga anaa magpuyo sa squatter's area sa dakbayan sa Sugbo.

Ang dapit diin magdako si Jessie maoy lublobanan sa mga mangingilad, manglabni, kawatan ug tulisan. Gumikan sa dili maayo nga palibot ni Jessie dali ra siya nga nahimo nga sagbot sa katilingban.

Maghilak ang adlaw kun si Jessie walay mailad, way malabni nga cellphone, kwintas nga bulawan, o kaha walay makawat nga hinayhay o hiniktan nga mga manok igtatari sa ilang silingan.

Hangtod nga miabot ang panahon nga si Jessie nakauban na gayod og mga tulis sa mga bangko, lending companies ug mga internet cafe. Kadaghan na usab siya makapanglugos. Miabot ang panahon nga si Jessie nahimo na nga public enemy no. 1 sa dakbayan sa Sugbo.

Samtang si Jessie namalandong sa mga kasal-anan nga iyang nahimo diha sa selda, kalit lang siya nga gibati og usa ka talagsaon nga espirituhanon nga kauhaw nga si Kristo lang ang makatambal.

Sulod sa tulo ka tuig, si Jessie naglikay gayod nga dili makatambong sa mga pagtuon sa Balaang Kasulatan nga ipahigayon sa nagkalainlain nga pundok sa pagtuo diha sa iyang bilanggoan sa matag karon ug unya.

"Apan, ugma motambong na gayod ako. Aron masayran ko ang ilang gipasiatab nga maayong balita sa kaluwasan. Gusto ako sa kinabuhi nga way kataposan sa dili pa ako mamatay," matud pa ni Jessie nga puno sa kadasig. (Kataposan)