Gikasilagan ko ang kalibotan

Gula 10

“Dili na kinahanglang masayod ka kun kinsa ko, Miss Atienza. Gusto lang kong makatabang nimo aron makakuha og maayong balita.”

“U-unsay buot mong ipasabot?”

Paminaw, Miss Atienza,” sa lalaki pa. Unya mikatawa kini. Katawa nga daw nagdala og makalilisang nga pasidaan.

Nahibulong si Sonia sa iyang nadungog. Sa iyang hunahuna, walay kataw-anan sa buot isulti sa lalaki nga nanawag kaniya sa telepono. Bahin man kaha sa balita ang isulti niini kaniya. Unya nganong mikatawa man kini? Kataw-anan ba nga balita ang buot niining itaho kaniya?

“Nasayod ko nga dako’g ikatabang sa imong career kining impormasyon nga ihatag ko kanimo, Miss Atienza,” nagkanayon ang misteryosong lalaki didto sa pikas tumoy sa telepono human mohunas ang kahimuot niini.

“Unsa man kanang maong balita?” Sukit ni Sonia.

“Adto sa Baguio Drive,” sa misteryosong lalaki pa. “Inig-abot nimo sa ibabaw nga bahin, adunay dakong hawan diha nga agi sa binuldosan sa nanghakot og quarry. Tua didto ang giingon ko kanimo nindot nga balita.”

“Ngano man diay? Unsa man diay ang atua didtong dapita?”

“Masayran mo ra kun atua ka na unya didto, Miss Atienza. Gusto ko nga ikaw ang makauna sa maong balita.”

Dayon naputol ang linya sa telepono. Gibutang na sa misteryosong lalaki nga nanawag kang Sonia ang awditibo niini.

Gibutang na lang usab ni Sonia ang awditibo nga iyang gigunitan. Mitan-aw siya sa relo nga nagbitay sa bungbong. Alas tres pa sa kaadlawon. -- Sumpayan pa