Misyon sa kasingkasing

Gula 3

Dihang miatubang kini kaniya, iyang nasuta nga ambongan ang maong lalaki. Mora’g si Tom Cruise, ang paborito niyang artista sa Hollywood.

“Hi!” Mitimbaya ang lalaki kaniya.

“H-hello,” wala sa hunahuna nga mibalos siya pagtimbaya.

“Ako si Bradley,” nagkanayon ang lalaki nga mihagad sa pagpaila sa kaugalingon niini kaniya. “Bradley Mangubat.”

Nag-ukon-ukon siya sa pagdawat sa binukhad nga palad sa lalaki. Ingon sa gipreskohan siya sa pagpakig-ilaila dayon niini kaniya. Pero sa iyang tan-aw, ingon sa edukado man ang maong lalaki. Mora’g dili bastos. Maong gidawat na lang niya ang kamot niini.

“A-ako si Sandra,” paila niya sa kaugalingon. “Sandra Diolan.”

 Sa dihang nagkapig-itay ang ilang mga kamot, nabatyagan ni Sandra nga lahi ang iyang gibati. Ang palad sa lalaki naghatod og kainit nga mikuyamang sa iyang kinatibuk-an ug nakapasalimuang sa iyang kaugalingon.

“Taga Cebu ka?” Sukit ni Bradley.

“Dili,” mubo niyang tubag. “Taga Davao City ko, sa Toril. Mobakasyon lang ko sa Cebu.”

“I see.”

“Ikaw? Taga diin ka man?”

“Taga Cebu gyud ko. Sa siyudad mismo. Sa Talamban ang amo.”

“Sa Mindanao ka nagtrabaho?”

“No. Miadto lang ko sa Cagayan de Oro aron pagtambong sa lubong sa akong uyoan.”

“May mga kabanay ka diay sa CDO?” -- Sumpayan pa