Gikasilagan ko ang kalibotan

Gula 9

“Nakasabot ko, Sir,” sawo ni Sonia. “Dili na haom sa trend ang akong artikulo. Dili na kini ang uso karon.”

“Hinaot nga dili nimo lainon pagsabot ang akong gibuhat, Miss Atienza. Apan nasayod ka na nga init karon ang kompetisyon sa newspapering. Kita ray gibantayan sa atong mga kakompetensiya tungod kay nasayod silang kusog kining atong pamantalaan bisan bag-o pa. Busa kinahanglang consistent usab kita sa atong paningkamot. Kinahanglan nga may ikapresentar kitang bag-o ngadto sa atong mga magbabasa sa matag-isyu sa atong pamantalaan.”

“Sagdi lang, Sir. Hatagan tika sa sunod og balita nga nindot kanang balita nga magustohan nimo.”

“Do it, Miss Atienza. Ikalipay ko kon buhaton mo kana.

Nianang pagkagabii, dugay nga nakatulog si Sonia.

Pagkakaadlawon, mibagting ang telepono didto sa sala. Sa nadugay nang pagkuriring niini, nakamata si Sonia. Mibangon siya ug migawas sa iyang lawak. Miadto siya sa sala aron pagtubag sa telepono nga nagpadayon pagbagting.

Kinsa man kaha ang nanawag niining orasa? Nakapangutana si Sonia sa iyang kaugalingon.

Gipunit niya ang awditibo sa telepono ug gipaod sa tuo niyang dalunggan.

“Hello?” niya pa.

“Hello, Miss Atienza,” tingog sa lalaki ang nabati ni Sonia didto sa pikas tumoy sa linya. Nanlimbawot ang iyang mga balhibo pagkadungog sa maong tingog.

“Kinsa ka?” Sukit ni Sonia. -- Sumpayan pa