Hiwi nga baruganan

Sayo pa gani sa buntag misibaw na sa tibuok dapit ang singgit sa mga tawo nga ang uban kanila nagbitbit og plakards. Nahisulat sa plakards ang ilang mga yangungo ug demanda batok sa kompaniya nga ilang giatubang karon. Ug miduyog usab sa ilang kabanha ang langgis nga tingog sa mga sirbato gikan sa mga guwardiya nga nagbantay sa gate.

Pulos nagbitbit og poras ang mga guwardiya ug daw andam na kining mobunal sa mga welgista kinsa mohimo unya og kalapasan. Buot sa mga guwardiya nga bungkagon ang pundok sa mga empleyado nga niining higayona mihimo og dakong welga. Ang naasoy'ng mga trabahante pulos sakop sa labor union nga gisabak sa grupong anti-government.

Luyo sa nagwelgang mga empleyado nagbarog usab nga maisogon ang mga opisyales sa labor union. Usa na kanila mao si Fred Monte kinsa napili sa unyon isip sekretaryo. Nagbarog siyang daw wala sa kaugalingon samtang nagtan-aw sa nagwelgang mga empleyado.

Nagsagol karon ang iyang gibati. Usahay, mopahiyom siya ug usahay usab mongislo ug manghupaw. Gisikdo siya karon sa kabalaka samtang naghunahuna sa umaabot nga linugdangan ning ilang pagwelga karon batok sa kompaniya nga maoy nakahatag og kinabuhi sa ilang pamilya.

Sa hilom, nagmahay siya ning nakab-ot nilang desisyon. Alang kaniya, dili pa unta kini mao ang panahon sa pagwelga kay nakita man gyod niya nga naigo sa kalibotanong krisis ang kompaniya. Apan mao kini ang nahukman sa tanan busa igo na lang gayud siya sa pagsuporta.

"Nganong nagtungok ka man diha, Fred?" Sukna sa ilang presidente kinsa nakamatikod diay sa iya karong paghinuktok... "Nagmahay ka ba?"

"Wala ... nganong magmahay man ko nga alang man kini sa atong kaayohan?" Milimod si Fred tungod kay nasayod man siya nga lisod tuison ang baroganan sa ilang pangulo. Unya miduol sila sa pundok ug miuban sa welga.

Nagkagubot dihadiha ang kompaniya. May milabay og bato ngadto sa edipisyo ug mga guwardiya, may miguba sa mga ali sa gate, ug may mibunlot sa pultahan sa tuyo nga makasulod. Hangtod nga miabot ang armadong mga polis ug gibungkag ang nagwelgang mga empleyado. Gidala nila sa ospital ang samaran nga mga guwardiya ug trabahante samtang ang uban usab gidala   ngadto sa police headquarters. Unya gihimo dayon ang sabotsabot tali sa mga opisyales sa unyon ug mga representante sa kompaniya.

Nianang pagkasunod adlaw, huyhoy ang abaga ni Fred nga mipauli sa ilang balay gikan sa kompaniya. Hinay siyang milakang og daw gibukotan na sa tumang kasubo.

"Nia ka na man diay, Dong Fred!" Mitimbaya kaniya si Lusing ang iyang asawa dihang nakita siya niini nga misulod sa ilang balay. "Tana sa kusina kay tua na didto ang mga bata. Magdungan ta sa pagpangaon!"

"Lamian kaayo kining pagkaon nato karon." Ni Fred pa ngadto sa iyang asawa ug mga anak, "Ug tingali, dili na nato kini matilawan pa. Wala na koy trabaho kay gisirad-an na sa tag-iya ang kompaniya nga akong gitrabahoan. Nahimo kaming biktima sa hiwi namong baroganan!"

Nahilom ang tanan tapos mamulong si Fred. Unya mao nalay iyang naamgohan ang kalit nga paghanap sa iyang panan-aw kay gibiawan na diay sa mga luha! (Kataposan)