Misyon sa kasingkasing

Gula 2

Gipahimutang ni Sandra ang iyang bag sa tiheras. Miginhawa siya’g lawom. Matag karon ug unya mopasiplat siya sa relo sa iyang pulso. May tunga pa sa oras nga nahibilin una molarga ang barko nga iyang gisakyan paingon sa Sugbu.

Wala pa molunga ang kabalaka nga kaganina pang nagsungog kaniya. Samtang dili pa makabiya sa pantalan sa Cagayan de Oro ang barko nga iyang gisakyan, wala pa siya makalingkawas sa hingpit sa mga tawo nga iyang gilikayan.

Mitindog siya ug milakaw paingon ngadto sa barandilyas sa barko. Midungaw siya ngadto sa dagat. Unya milantaw ngadto dapit sa Kasadpan. Gisud-ong ang adlaw nga hapit na mosalop. Unya giwaling niya ang iyang panan-aw ngadto sa daplin -- sa pier. Subli niyang gianinaw kun wala bay mga tawo nga nakasunod kaniya ug naniid kun wala ba siya sa taas sa barko.

Mibiya siya sa barandilyas ug mibalik sa iyang tiheras. Misantop sa iyang hunahuna nga dili maayong magpabantang siya. Sayon ra siyang makit-an sa mga tawong nagpangita kaniya kun magpaatbang siya sukad sa barko ngadto sa pantalan.

Mihuwas ang iyang kabalaka sa dihang nakabiya na gayod ang barko sa pantalan sa dakbayan sa Cagayan de Oro. Goodbye ninyong tanan, nagkanayon siya sa hilom.

Pipila ka gutlo sukad sa pagbiya sa barko sa pantalan, may tingog nga milanog sa loud speaker. Gipahimangnoan ang tanang mga pasahero sa pagpahimutang sa tagsatagsa nila ka tiheras kay sugdan na ang pag-inspeksiyon sa mga ticket.

Usa ka lalaki ang milingkod sa ngilit sa tiheras nga tupad sa iyang giokupar. Gipanid-an lang ni Sandra ang mga lihok niini. Misantop sa iyang hunahuna nga ang maong lalaki maoy nag-okupar sa tiheras nga tupad sa iyaha. -- Sumpayan pa