Gikasilagan ko ang kalibotan

Gula 8

Paggawas niya sa pultahan, nasugatan niya si Ethan. Wala kini niya tagda. Mipaturatoy siya paglakaw. Apan nabati niyang miigot ang sera sa pultahan sa opisina sa ilang editor mao nga nagtuo siyang misulod si Ethan ug nakigsulti kang Mr. Orioque.

Midiretso si Sonia sa nahimutangan sa iyang sakyanan. Giablihan niya ang pultahan sa driver’s side ug misakay. Wala niya paandara ang makina sa sakyanan. Gihapak niya ang manibela niini gumikan sa gibati niyang kalagot.

Iyang gibasa ang gihikay niyang manuskrito sa balita. Maayong pagkahan-ay niya ang iyang artikulo. Unya gisunod niya pagsid-ing ang mga hulagway nga kuha ni Ethan. Maayo usab nga pagkakuha ang maong mga hulagway.

Pero nganong gi-reject man ni Mr. Orioque ang iyang materials?

Naigking siya dihang iyang namatikdan nga miduol diay si Ethan kaniya. Nanuktok kini sa passenger’s side sa sakyanan. Iya kining giablihan. Pero wala mosulod ang lalaki sa sakyanan. Nagbarog lang kini sa gawas.

“Paadtoon ka ni Sir sa iyang office,” nagkanayon si Ethan. “May mahinungdanon kuno siyang pakigsultihan nimo.”

“Bahin sa unsa man kuno?” Nangutana siya.

“Ambot lang,” maoy tubag. “Adtoa lang aron imong masayran.”

Unya mibiya na si Ethan sa iyang nahimutangan.

Nakig-atubang si Sonia kang Mr. Johnny Orioque.

“Gipatawag man kuno ko nimo, Sir?” Sukit gilayon ni Sonia.

“Yes,” sa editor pa. “Because I don’t want to dissappoint you. Pero...” -- Sumpayan pa