Beautiful girls

Upat kaming magkabarkada sa haysikol sa among lungsod sa Santa Rosa. Apan ako ray nalahi kanila og hitsura. Guwapa sila si Monette, Liza ug Carol. Gitawag sila’g beautiful girls sa among school campus.

Gusto na kong modistansiya kanila kay mora’g insecured ko sa akong kaugalingon kun ikauban ko sila. Di sab nuon ko matawag nga batig nawong, kasarangan lang ang akong hitsura. Apan layo ra gyud ko sa tulo ka mga amiga kun taparon kami.

"Naunsa ka ba, Beth? Guwapa ka sab, uy!"

Igo lang kong mitan-aw kang Carol usa ka higayon niana nga gisultihan ko sila nga di na ko makig-uban kanila.

"Bitaw, Beth. Anugon sa atong friendship nga maungkag. Ayaw og buwag namo, uy!"

Wa ko magtingog nga mitutok kang Monette.

"Since sa atong pag-first year sa haysikol barkada na tang upat, Beth. Graduating na nuon ta karong tuiga, mobuwag ka na namo?"

Sa akong tan-aw, matinud-anon ang tulo sa ilang gisulti. Nahinugon sila kanako nga mahimulag sa among grupo. Miyango-yango ko. Unya mikatawa ko.

"Bitaw, no! Madala man sab ko sa pagtawag kaninyo’g beautiful girls."

Nalipay ang tulo ko ka mga amiga. Unya, gisubli namo ang pagpagawas sa tagsatagsa namo ka mga pangandoy.

"Gusto gyud kong mag-nurse. Makagasto ang akong parents nako niini kay bugtong anak ug dako kami’g kamaisan ug kalubihan sa bukid."

"Law gyud ang akong kuhaon. Gusto sab kini ni Papa ug Mama."

"Mag-architech gyud ko kay gusto kong magdesinyo’g mga building."

Nahimuot kaayo ko sa ambisyon nila ni Monette nga magnars, si Liza nga mag-architech ug ni Carol nga mag-abogada. Nalipay ko nga determinado sila sa ilang mga pangandoy.

"Sa gikaingon ko na, magmaestra ko." Gipagawas ko kanila’g usab ang akong pangandoy. "Gusto kong mahimong instrumento alang sa maayong kaugmaon sa kabataan."

Nanglabay ang mga tuig human sa among paggradwar sa haysikol, nakab-ot ko gyud ang kalamposan sa akong ambisyon. Nakahuman gyud ko sa kursong edukasyon. Apan naguol ko sa tulo nako ka barkada. Natental sila sa gugma. Napamabdosan sila sa tagsa-tagsa nila ka boyfriend. Naminyo sila nga wa makahuman sa kurso nga gipangkuha.

"Maayo ka pa, Beth, milampos gyud. Samtang ako, nia, lusyang na kay duha nay anak. Wa pa gyu’y tarong nga trabaho ang akong bana."

Nakapanghupaw ko nga mitutok kang Monette. Unya sila na sab si Liza ug Carol ang gitagsa-tagsa ko pagtan-aw. Nagkakita kaming tulo sa bunyag sa ikaduhang anak ni Liza, usa ako sa nahimong maninay.

"Di na kami angayang tawgon og beautiful girls, Beth. Sud-onga ra gud kaming tulo? Pulos na nanay kaayong tan-awon."

Hilaw kong mipahiyom kang Liza. Unya mihilak ang batang gikugos ni Carol. Maulawon siyang mitan-aw nako. Gipatutoy niya ang iyang anak aron mohilom.

"Ikaw ang nakalampos natong upat, Beth. Maayo kay wa ka magpatental sa love."

"Makahuwat ang gugma, Carol. Ang akong ambisyon maoy akong priority."

Mipauli ko niadtong adlawa nga nagbalon og kahinugon sa kapalaran nga naangkon sa tulo nako ka barkada nga gitawag kaniadto og beautiful girls. (Kataposan)