Giluod ang ungo sa dugo ni Teryo

Mahilig si Teryo sa mga babaye nga nagbaligya sa ilang dungog. Mao nga kada gabii moadto gyod siya sa suki niyang Casa nga tua mahimutang sa hilit nga bahin sa usa ka kalye sa siyudad. Sa iyang pangidaron nga kuwarenta anyos wala na siya makahunahuna og kaminyoon kay alang niya samokan siya nga makabaton og pamilya.

Nakasaksi man god siya sa nahitabo sa iyang igsoon nga si Pabling nga nabilanggo og kadiyot dihang hiabtan niini ang iyang asawa nga nagdulag kalayo uban sa laing lalaki didto mismo sa ilang kuwarto sa balay.

Gitigbas ni Pabling ang lalaki ug apil na ang iyang asawa ug niining hitaboa maong wala na gyod magpaatom-atom si Teryo og pangulitawo og mga babaye. Malingaw na lang siya niining iyang kalingawan nga mangabang sa Casa sa siyudad.

Unya usa ka sayong buntag may namatikdan si Teryo sa iyang lawas nga morag lain kaayo ang iyang pamati niini. Kanunay na siyang takigan panahon sa gabii, busa, nagpahiling siya'g usa ka espesyalista nga doktor.

"Uy, kuyaw kining sakita, Teryo," sa doktor pa. "May AIDS ka ug peligro kini kay wala pay tambal niini. Ug dili man ni sa pag-unsa, Teryo, mag-antos ka niining sakita, kay naa na kini sa imong dugo...."

Ingon sa mihungo kang Teryo ang kalibotan human niya mabati ang gibatbat sa doktor bahin sa matang sa iyang sakit. AIDS! ang akong sakit! Kahilakon si Teryo sa hilom. Unya mipauli siya ug kay nagabhian siya, iya na lang gibaktas ang dalan paingon sa ilang balay. Sa agianan giatngan siya'g usa ka ungo ug wala mahadlok si Teryo kay gusto sab niya nga mamatay siya. Tuod mihamag dayon ang mangtas nga ungo ug gipaak si Teryo ug gisupsop ang iyang dugo.

"Maayo kay imong gisupsop ang akong dugo, ungoa ka,kay AIDS ang akong sakit, sige pa, hutda gyod ang akong dugo!!" hangyo ni Teryo sa ungo. Apan morag giluod ang ungo ug misutoy kini pagdagan nga nagsige'g kulihad," Tuhiiii, tuhiiii, tuhiii." (Kataposan)