Gula 3
Mimug-ot ang nawong ni Sonia pagkadungog sa gisulti sa editor. Dihadiha mitindog siya ug nanamilit. Gilikayan niya ang pagtan-aw kang Ethan. Migawas siya sa buhatan sa editor. Nahibilin sila si Mr. Orioque ug Ethan sa sulod sa opisina sa nahauna ug may gipanagsultihan.
Dihang gibuksan na ni Sonia ang pultahan sa walang kilid sa iyang sakyanan, nalantawan niya si Ethan Herra nga maoy paggawas sa lobby sa BBN Publications. Wala kini niya tagda. Naglagot siya sa maong lalaki. Wala siya’y gusto nga kini ang gihatag ni Mr. Johnny Orioque kaniya nga maoy iyang photographer.
Misakay si Sonia sa iyang sakyanan. Paandaron na unta niya ang makina sa dihang nanuktok si Ethan sa tuong pultahan sa sakyanan. Nasabot ni Sonia nga gustong mosakay si Ethan sa iyang sakyanan.
Gibuksan ni Sonia ang bildo sa bentana sa sakyanan.
“Wala ka bay kaugalingong sakyanan?” Gipangutana niya si Ethan.
“Aduna,” tubag sa lalaki. “Pero kinahanglang mag-uban ta sa usa ka sakyanan tungod kay partner man kita sa pagpanguhag balita.”
Wala makatingog si Sonia. Misamot ang iyang kalagot.
“Kun gusto ka,” ni Ethan pa, “ang akong awto maoy atong sakyan.”
“Ayaw na lang,” gibundak ni Sonia ang maong mga pulong dayong abli sa pultahan sa tuong kilid sa iyang awto.
Misakay si Ethan. Wala pa gani makapahimutang pag-ayo si Ethan sa lingkoranan, gipadagan na ni Sonia ang sakyanan. -- Sumpayan pa