Itlog nga bulawan

Usa ka higayon niana, samtang nagkapuliki si Ode og pamira sa mga bagon sa nito nga nangapot sa mga dagkong punoan sa kahoy, kalit lang siyang nahapalingi sa usa ka dapit, tungod kay may nabatian man siya nga daw may mikapakapa.

Sa iyang pagsusi, iyang nakita ang usa ka dumagang manok, nga maayo kaayong pagkabitik sa usa ka palabay, nga daw gituyo gayud sa pagbutang sa maong dapit.

Bisan kun giunsa pagkisikisi sa maong manok, wala gayud kini makabuhi. Hangtod nga giabot na lang kini’g kaluya ug nagtungok na lang.

Daling gisakob ni Ode ang sundang nga iyang gikuptan sa sakuban niini, ug giduol niya ang maong manok. Iya dayon kining gikuha gikan sa palabay. Dayon, iya kining gihapyodhapyod, ug gipisilpisil pa ang usa ka tiil niini. Kadtong tiil nga maoy napasok gyud sa laang.

Sa dihang naulian na og diyotay'ng kabaskog ang maong manok, iya dayon kining gitugpo sa unahan. Mao man guy iyang tuyo, nga buhian ang maong manok. Ug makauli kini sa iyang gigikanan. Naglibog hinuon si Ode, kun diin gikan ang maong manok. Kay layo man kaayo sa mga kabalayan ang maong dapit. Ug dili man sab hitsurang ihalas ang maong manok. Ilabi na kay ugis ang balhibo niini.

Usa ka buntag niana, samtang nagpatuka si Ode sa ilang mga binuhing manok, iyang nasigpatan nga may usa ka manok nga nag-anam og duol sa iyang nahimutangan. Unya, sa dihang naduol na kini kaniya, nagsigi kini og birig, daw sa nakighagwa.

Gisuwayan og dakop ni Ode ang maong manok, kay morag hagop man kaayo kini kaniya. Ug nadakpan gayud niya kini. Wala lang gani gayud mokisikisi ang manok, ug daw miayon nalang nga gikuptan siya ni Ode.

Ang natingad-an ni Ode, kay ang manok nga iyang gikuptan, mao man gihapon ang manok, nga nakuha sa palabay ug iyang gibuhian didto sa lasang, nga iyang gipanguhaan og mga bagon sa nito.

Nahunahunaan na lang hinuon ni Ode ang pagbuhi sa maong manok. Maong iya na lang usab kining gisulod sa usa ka bakanteng tangkal.

Nianang pagkasunod buntag, sayong gisusi ni Ode kun anaa pa ba gihapon sa tangkal ang maong manok. Ug iyang nakita nga didto pa gihapon kini. Nagluob pa ang manok niadtong tungora.

Sa dihang kuhaon na unta ni Ode ang manok, maoy iyang nakita nga may itlog diay kining gilumloman. Nahibulong kaayo siya sa maong itlog, kay dili man kasarangan ang kolor niini, ug ingon man usab ang gidak-on.

Gisulayan sa pagpakita ni Ode sa iyang amahan ang maong itlog. Ug nahibulong usab kaayo ang iyang amahan sa pagkakita niini. Nagduda hinuon kini, nga dili usa ka ordinaryong manok ang nadakpan ni Ode. Kay bulawan man ang giitlog niini.

Wala gyud masayop ang amahan ni Ode. Bulawan gayud diay ang itlog sa maong manok. Gisulayan man gud niya kini og pakita sa usa sa iyang mga higalang negosyante, nga tiggama og mga alahas.

Tungod sa maong manok, nahimong sapian sila si Ode. Gawas nga nakapatukod sila’g dako kaayong balay, nakapamalit pa usab sila og mga mahalong butang. (Kataposan)