Gikasilagan ko ang kalibotan

 Gula 2

“Welcome back, Miss Atienza,” nagkanayon si Mr. Orioque nga miyanghag ug mitimbaya kaniya dungan ang pagsenyas kaniya sa paglingkod.

Milingkod si Sonia sa bakanteng silya sa atubangan sa office table sa editor-in-chief.

“Dawata ang uwahi kong pahasubo sa nahitabo sa imong manghod,” matud ni Mr. Orioque nga mitunol sa binukhad niining kamot ngadto kaniya alang sa pakiglamano.

“Thank you, Sir,” ni Sonia dungan ang pakiglamano sa editor-in-chief.

May isulti unta si Sonia ngadto sa editor dihang miigot ang pultahan. Nahalingi si Sonia. Maoy iyang nakita ang usa ka lalaki nga may dalang kamera. Misulod kini ug miduol sa ilang nahimutangan.

“Good morning, Sir,” nangatahoran ang bag-ong nahiabot ngadto sa editor. Unya miatubang kini kang Sonia. “Good morning, Miss...”

“Sonia,” sa editor nga mipaila sa dalaga ngadto sa lalaki. “Siya si Sonia Atienza, atong staff reporter dinhi.”

Wala lang magtingog si Sonia.

“Tuod diay, Miss Atienza,” matud ni Mr. Orioque. “Siya si Ethan Herra, ang bag-o natong photographer dinhi. Siya nay kauban mo kanunay sa tanan mong mga lakaw aron pagpanguha og balita.”

“Si Mr. Bagcat ang gusto kong kauban, Sir,” ni Sonia pa nga miprangka. “Maayo si Art kay mag teamwork na kami.”

“Ako nang gi-assign si Art Bagcat sa laing beat,” pasabot sa editor. “Sila nay magkauban si Rey Dalay. Mao nga si Ethan na ang kauban mo sukad karon. Maanad ka ra lagi niya. Gamay’ng adjustment lang.” -- Sumpayan pa