Gikasilagan ko ang kalibotan

Gula 1

Lunes sa buntag. Maoy pagbalik og report ni Sonia sa iyang trabaho. Usa siya ka staff reporter sa pamantalaan nga Bantay Balita. Kapin sa usa ka semana siyang mi-leave sa iyang trabaho tungod sa kamatayon sa iyang igsuon.

Gikaguol pag-ayo ni Sonia ang kamatayon ni Anita, iyang manghod. Si Anita maoy natingban sa iyang pagmahal sanglit wala na man sila’y mga ginikanan. Apan naghikog si Anita. Gipangunayan sa iyang manghod ang pagkutlo sa kinabuhi niini. Wala makadawat ang iyang manghod sa iyang gidangatan.

Nagsabak si Anita sa bunga sa gugma nila ni Froilan. Apan nagdumili si Froilan sa pagpanubag sa iyang kahimtang. Mao kini ang hinungdan nga naguol pag-ayo si Anita. Aron paglikay sa kauwawan, naghikog ang manghod ni Sonia, butang nga nagbilin kaniyag dili tiaw nga kasub-anan.

Karon nga mibalik na si Sonia sa pag-report sa iyang trabaho sa BBN Publications, misantop sa iyang hunahuna nga makigkita una siya sa ilang editor-in-chief nga si Mr. Johnny Orioque. Mao nga midiretso siya sa buhatan niini.

Tok! Tok! Tok!

Gituktok ni Sonia ang pultahan.

“Come in,” nabati ni Sonia ang tingog sa usa ka lalaki didto sa sulod.

Gihinay pagtukmod ni Sonia ang palid sa pultahan. Dihang natukas na kini, mihinay siya pagsulod. -- Sumpayan pa