Oras mo na, Rey Corpuz!

Gula 53

Si Cong. Gustavo Bacar ingon sa nabuang-buang. Nagsige na lang kini’g katawa. Mora’g wala na sa hustong pangisip ang kongresista.

Si Doktora Vonna Lazaro nakakita’g higayon pagluwas sa iyang kaugalingon. Milugnot kini ug nakabuhi gikan sa paggunit ni Cong. Bacar.

Dihadiha gipusil ni Rey Corpuz si Cong. Bacar. Apan wala kini niya ig-a sa patyanan. Gipadaplisan lang kini niya sa bukton aron mawagtangan og umoy ang kamot niini nga naggunit og armas.

“Ni-boomerang na ang imong insanity, Cong. Bacar,” sudya ni Rey dihang naposasan na ang kongresista.

Katawa ray gitubag ni Cong. Bacar kang Rey. Kun inartista man o dili ang gipakitang pagkayabag sa kongresista, dili na kini importante alang ni Agent 11-M. Ang mahinungdanon mao nga nadakpan na ang kongresista ug makapanubag na kini sa daghan niining kasal-anan.

Ug labaw sa tanan, walay daotang nahitabo kang Vonna.

Pagkasunod adlaw, nadakpan sa mga awtoridad si Prosecutor Filemon Rocantos, ang bayaw ni Cong. Bacar nga maoy tag-iya sa Inibam Logistics, ang labing dakong illegal nga buhatan og mga armas sa Asia nga maoy nag-supply og mga armas sa teroristang grupo nga Jehaddah Sellamiah sa mga operasyon niini sa Pilipinas, partikular na sa Cebu.

Buot untang mosibat si Prosecutor Rocantos ngadto sa gawas sa nasud apan nasakpan kini sa mga awtoridad sa pagsulod niini sa airport. Giposasan dayon siya sa mga awtoridad.

   Paglabay sa usa ka semana, gipakigkitaan ni Rey si Vonna sa balay nga gipuy-an niini. Nakamatikod si Rey nga ingon sa may kasuko si Vonna kaniya.

 “Di diay ko importante para nimo, ha?” Giingnan si Rey ni Vonna.

“Ngano bang nakasulti ka man og ingon niana?” Sukit ni Rey.

“Nganong miingon ka man nga wa kay labot kun patyon ko ni Cong. Bacar?”

“Komedya ra to, uy. Gilansisan ko lang si Cong. Bacar. General rule: always call their bluff.”

Nakasabot dayon si Vonna sa gisulti ni Rey. Gigakos niya kini. Unya nag-akob ang ilang mga ngabil. -- Kataposan