Ang silot

Mingislo ang dagway ni Fredmon gumikan sa naglagiting nga kainit sa nagkataas nga adlaw samtang nagtikad siya sa iyang uma nga nahimutang sa bukirang barangay sa Catmon. Gitangtangan niya sa yugo ang gikutasan na niyang kabaw ug giguyod niya ang mananap paingon sa ilawom sa dakong kahoy nga mangga diin atua mahimutang ang lunangan sa kabaw aron ipatuna.

Mao man goy naandan sa mga mag-uuma ang pagpatuna sa ilang gidaro nga kabaw ngadto sa lapokon nga lunangan matag karon ug unya aron mahibalik ang kusog sa naluya na nga kabaw. Kusgan na unya kining mobunlot sa puthaw nga daro nga maoy mobungkag sa yuta.

Dihang miubog na ang kabaw sa lunangan, milingkod dayon si Fredmon sa miigdal nga gamot sa mangga ug misandig sa puoan niini. Ug ang kabugnaw sa landong sa maong kahoy daw yelo nga mikuyanap dayon sa kinatibuk-an ni Fredmon ug mipahupay sa gibati niyang kainit. Unya nanghupaw siya. Lawom ang iyang pagpanghupaw dihang nanumbalay na usab sa iyang hunahuna ang tulisok sa kapalaran nga iya karong gisagubang!

Usa ka negosyante si Fredmon kaniadto. May dako siyang tindahan nga nahimutang sa sulod sa merkado publiko sa siyudad sa Lapulapu. Gawas sa pag-abag sa iyang asawa nga si Sita ug sa iyang duha ka dalagang anak nga si Juvy ug Jenny nagsuhol pa gayod siya'g mga tindera. Pinangga man god niya ang iyang pamilya ug dili siya buot nga mahago sila sa gimbuhaton sa tindahan labi na niining panahona nga nagsugwak ang ilang mga customer.

Usa ka adlaw niana, may usa ka batan-on ug guwapa nga babaye nga misulod sa ilang tindahan. Seksi kaayo ang maong babaye sa gisul-ob niining mubo nga sayal ug huot nga t-shirt ug kutob lang sa pusod ang gitas-on. Mihulma ang nindot nga lawas niini ug mituybo ang ugdo sa dughan.

"Moaplay unta ko pagkatindera, Sir..." sa babaye pa sa paraygon nga tingog. Mitubod ang laway ni Fredmon samtang mipasiplat sa paa, tiyan ug sa dughan sa babaye.

"S-sige, Day, karon dayon magsugod ka na sa pagtrabaho dinhi." Tuaw niya dayong lad-ok og laway, "Yuna pa ... unsay imong ngalan?"

"Tawga lang ko'g Myrna Kubo, Sir, taga Mindanao ko!" Sa babaye pa dayong pahiyom nga nakapahulma sa lawom niining kandiis.

Sugod niadtong adlawa kanunay nang pusturawo si Fredmon. Gani, migamit na siya og mahalon nga perfume. Ang mao niyang kausaban namatikdan usab ni Sita apan wala lang niya kini tagda kay busy siya sa gimbuhaton sa tindahan. Hangtod nga miabot ang adlaw nga nahimong kabit ni Fredmon si Myrna.

Milabay ang pipila ka adlaw ug nabatyagan ni Fredmon ang hinayhinay nga pagkalugi sa ilang negosyo. Nagkaanam na'g kagamay ang ilang halin ug nagkadiyotay na ang mopalit sa ilang tindahan. Ug nunot usab niini midako ang gasto ni Fredmon kang Myrna kay dakong salapi na man ang pangayuon niini kaniya. Matag pangayo sa dalaga kang Fredmon mobahad gyod kini nga mopalayo kun dili siya hatagan. Ug ang maong bahad gitinuod gayod ni Myrna dihang wala mahatag ni Fredmon ang usa ka gatos ka libo ka pesos nga iyang gipangayo kay nasayran na man ni Sita ang ilang relasyon.

Mingislo na sab ang dagway ni Fredmon human maigo sa naglagiting nga kainit sa adlaw. Unya gitaod niya pagbalik ang yugo sa liogan sa kabaw ug misugod dayon pagdaro sa sagboton nga yuta. Dili niya igsapayan kun moani ba o dili ang iya unyang itanom kay bug-os na niyang gidawat ang silot nga iya karong gisagubang! (Kataposan)