Sa kahimtang ni Rey Corpuz nga gibilanggo sulod sa tangkal nga puthaw, wala siya’y mahimo sa pagpanalipod sa iyang kaugalingon kun may buhatong daotan sila si Cong. Bacar kaniya. Paaboton na lang niya ang sunod nga mahitabo.
“Jupiter,” gisangpit ni Cong. Bacar ang iyang sinaligan.
“Ngano, Boss?” Gikan ni Jupiter.
“Pagawasa si Komeni sa iyang tangkal,” nagkanayon si Cong. Bacar nga ang gipasabot mao ang iro nga doberman. “Ug pasudla siya sa tangkal ni Rey Corpuz aron kunis-kunison niya kini.”
Milihok dayon si Jupiter. Apan dihang ablihan na unta niini ang tangkal sa doberman, kalit lang milanog ang sipang mga buto-buto didto sa gawas. Ingon sa nakalitan sila si Cong. Bacar ug Jupiter sa ilang nabati.
Dihadiha nagdali ang duha paggawas sa underground aron kaha pagsusi sa hinungdan sa mga buto-buto.
Si Rey Corpuz ingon sa kalit lang nabuhian sa paglaom. Naghunahuna dayon siya sa angay niyang buhaton aron maluwas sa iyang kahimtang.
Milirawliraw siya sa palibot sa undergound. Hangtod nga nasangit ang iyang panan-aw sa yawe nga nahimutang sa ibabaw sa lamesa. Dihadiha may misantop sa iyang hunahuna.
Gi-activate ni Rey ang magnetic force sa iyang relo. Iyang gipunting ang yawe didto sa ibabaw sa lamesa. Nasuyop sa bato-balani sa iyang relo ang yawe hangtod nga nagunitan kini sa iyang kamot.
Nahimuot si Rey sa hilom. Napahimuslan gayod niya ang hidden assets sa relo nga giisyu sa 9mm kaniya.
Wala maglangan si Rey. Gipasok dayon niya sa kandado sa tangkal nga iyang nahimutangan ang yawe. Wala siya masayop sa iyang pagtuo nga alang gayod sa kandado sa tangkal ang maong yawe kay mibukas man kini. Giablihan dayon ni Rey ang tangkal ug migawas siya.
Arp! Arp! Arp! Gipaghot si Rey sa doberman nga gisulod sab og tangkal. Nagbahis kini pag-ayo didto sa sulod.
Wala na hatagi’g pagtagad ni Rey ang lihok sa doberman. Nagdali siyang mibiya sa underground.
Didto sa gawas, nagpadayon pa ang pinusilay. -- Sumpayan pa