Nagtakoban nga pagbati

Gula 79

“Nadala ka sa tentasyon o nagpadala ka sa tentasyon?” Sikmat ni Denia. “Karaan na kaayo kanang imong style, Efren. Gilumotan na kana sa panahon.”

Nakita ni Denia nga misihag ang guilt sa mga mata niini sa wala pa kini molikay sa iyang tinan-awan.

“Pasayloa na ko, Denia,” gikan na usab ni Efren. “Hatagi ko’g laing higayon. Isaad ko nimo nga mag-usab na ko.”

“Mag-usab o mousab?” Gitutokan niya ang lalaki.

Si Efren ingon sa dili gayod makaharong sa iyang tinan-awan.

“Ikahatag ko kanimo ang akong pasaylo,” ni Denia pa. “Pero dili na ko makahatag nimo’g laing higayon. Wa koy pasalig nga mag-usab ka pa.”

‘Denia, please,” hangyo ni Efren. “I realized nga ikaw ang akong gimahal. Ipadayon nato ang atong gugma.”

“Nakasulti ka lang niana tungod kay gitalikdan ka na man ni Sarah.”

“D-Denia...?”

“Nasayod na ko sa nahitabo. Si Sarah mikuyog sa penpal niyang Hapon. Ug misiri nimo. At least, natagamtaman sab nimo ang kasakit nga imong gipatagam nako kaniadto.”

“Angkonon ko nga usa ka dakong kasaypanan ang akong pagluib sa atong gugma. Apan nagbasol na ko. Busa hatagi ko’g laing higayon aron akong kahulipan ang akong pagkuwang nimo kaniadto. Please...”

“Nagtuo ka ba nga ingon lang niana kasayon ang tanan?”

“Denia, gihigugma ko ikaw. Tug-ani ko kun unsay akong buhaton aron makuha ko pagbalik ang imong pagsalig.” -- Sumpayan pa