Gula 49
Gikalingawan og paghot si Rey Corpuz sa doberman nga iro dihang nahisulod na siya sa tangkal. Kun wala pa kaha usab tangkala ang maong iro, seguradong mihamag na kini kaniya.
“Wa ka bay cynophobia, Mr. Corpuz?” Gipangutana si Rey ni Jupiter.
“Wa koy bisan unsang matang sa phobia,” tubag ni Rey.
“Di diay ka mahadlok og iro?” Sukit ni Jupiter. “Labi na og doberman nga bangis kaayo?”
“Kuyaw kanang iroa busa angay kahadlokan,” ni Rey pa. “Pero dili tanang kahadlok matawag og phobia.”
Wala nay giluwatang mga pulong si Jupiter. Igo na lang kining mipasupot og hait kaayong tinan-awan kang Rey. Unya mibiya na kini sa underground.
Dihang nakagawas na si Jupiter sa underground, gi-activate dayon ni Rey Corpuz ang iyang relo nga may microchip nga magamit panahon sa emergency. Pinaagi sa maong relo, ma-monitor sa central monitor sa 9mm ang dapit nga iyang nahimutangan ug ma-rescue siya sa maong ahensiya.
Suwerte si Rey nga wala kuhaa’g apil sa mga sakop ni Cong. Gustavo Bacar ang iyang relo. Ang iya rang armas ug cellphone maoy ilang gikuha.
Alang kang Rey, utokan si Cong. Bacar. Nakakita kini’g paagi aron malingla ang 9mm. Pero may mga buslot ang mga paagi sa kongresista. Dili kongkreto ang mga paagi niini. Ug bisan pa kaha’g malingla nila ang 9mm ug mosugot nga i-trade siya kang Abaddon, nakaseguro si Rey nga dili gihapon makalikay si Cong. Bacar ug mga kauban sa tulobagon niini sa balaod.
Mikidlapkidlap ang relo ni Rey, timaan nga na-activate na ang function sa microchip niini. Dihang nakadungog siya’g mga tunob nga nagsingabot sa iyang nahimutangan, gidali paghipos ni Rey ang iyang relo. Dili siya gustong makita ang iyang relo ni bisan kinsa.
Si Cong. Bacar ang misulod sa underground. Kuyog sa Kongresista ang tulo niini ka sakop nga pulos armado.
“Nakontak na nako ang 9mm gamit ang kaugalingon mong cellphone, Mr. Corpuz,” pahibalo ni Cong. Bacar. “Nasayod na sila sa imong gidangatan.”
“Dili big deal ang imong gibalita nako, Cong. Bacar,” giingnan ni Rey ang kongresista.-- Sumpayan pa