Gula 78
Natukmaan niya si Efren nga naglingkod nga nag-inusara sa taas nga bangko nga hinimo sa tibuok nga kahoy nga nahimutang sa sala. Mibarog kini pagkakita kaniya nga nagsingabot.
“M-maayong gabii,” may kataha ang tingog ni Efren nga nangatahoran.
“Maayong gabii sab,” mubong tubag ni Denia.
Milingkod siya sa usa ka silya atbang sa gilingkoran ni Efren.
“Nganong nia ka?” Sukit dayon ni Denia.
“W-wa ba ko makadisturbo nimo?” Sumbalik pangutana ni Efren.
“Nakadisturbo gyud. Mao nga sulti na dayon kun unsay imong tuyo.”
Miduko si Efren nga mora’g nahilis sa iyang gisulti. Gituyo niya nga dili hatagan og maayong pagtagad ang lalaki tungod kay hangtod karon wala pa siya makalimot sa gibuhat niini kaniya.
Napasaylo niya si Jonas tungod kay nakasabot siya sa sitwasyon. Nga si Jonas nabiktima lang sa kahigayonan. Apan lahi si Efren tungod kay nagbudhi man gayod kini sa ilang relasyon pinaagi sa pagpakig-relasyon niini kang Sarah. Mao nga naglagot pa siya kang Efren hangtod karon.
“Denia, sorry sa nahitabo,” matud ni Efren sa tingog nga puno sa pangaliyupo. “Nadala lang ko sa tentasyon.” -- Sumpayan pa