Nagtakoban nga pagbati

Gula 76

“Wa-wa ka na ba masuko nako?” Sukit ni Jonas.

“Makigsulti kaha ko nimo kun nasuko pa ko?” Gisumbalik niya’g pangutana ang lalaki. “Way kapuslanan kun magbaton ako’g kasilag kanimo hangtod sa hangtod. Naghatag lang kana’g kabug-at sa akong dughan.”

“A-ang buot mong ipasabot nga makapasaylo ka na nako?”

“Dugay ko ra ikaw’ng gipasaylo, Jonas. Mao nga wa ka nay angay hunahunaon bahin kanako. Ang maayo mong buhaton mao nga atubangon mo ang kaugmaon uban kang Ester. Ingon gayod niini ang kinabuhi. Dili sa tanang panahon nga ang atong gusto maoy matuman ug wala kitay laing mahimo gawas sa pagdawat sa kamatuoran.”

Wala motingog si Jonas. Naghinuktok kini sa iyang atubangan.

Nakita ni Denia nga wala nay angay pang panagsultihan sila si Jonas. Gikasulti na niya ngadto niini ang tanan nga buot niyang isulti. Gusto na ni Denia nga taposon ang ilang panagsulti.

“Di ko makahatag nimo’g taas nga panahon, Jonas,” nagkanayon si Denia. “Di ko gustong mahilambigit sa eskandalo. Tingalig may makakita nato ug makasumbong ngadto sa imong asawa. Lisod na kaayo kun mahitabo kini. Di ko gusto’g kasamok. Hinaot nga makasabot ka sa akong bahin.”

“N-nakasabot ko, Den,” ni Jonas pa. “Ayaw kabalaka. Di ko ikaw i-angin sa akong problema.”

“Salamat.”

“S-sige, a-adto na ko.”

“Pag-ayoayo.” -- Sumpayan pa