Oras mo na, Rey Corpuz!

Gula 45

Ang souvenir program sa necrological service ni Cong. Jovito Lazaro nga napunitan ni Rey Corpuz sulod sa compound sa Inibam Logistics naghatag kaniya’g laing trace.

Nagtuo si Rey nga konektado sa illegal nga pabrika sa mga armas ang kamatayon ni Cong. Lazaro. Nagduda si Rey nga usa sa mibisita ug mitambong sa necrological service ni Lazaro didto sa Cebu ang misulod sa maong pabrika.

Kini maoy gianalisar pag-ayo ni Rey. Kun nakasulod ang maong tawo nga nagdala sa souvenir program sa necrological service ni Cong. Lazaro -- sa Inibam Logistics, nagpasabot nga wala did-i pagsulod ang maong tawo sa nahisgotang dapit.

Posibleng ang maong tawo usa sa nagdumala sa Inibam Logistics o kaha suod sa tagdumala niini. Busa posibleng may koneksiyon gayod ang kamatayon ni Cong. Lazaro sa pabrika sa mga armas. Kun dili man usa sa mga tagdumala sa pabrika ang nakadala sa necrological service souvenir program ngadto sa pabrika -- nga napunitan ni Rey -- basin usa sa mga sinaligan niini ang nakadala sa maong papel.

Misantop usab sa hunahuna ni Rey nga basin og usa si Cong. Lazaro sa nagpaluyo sa illegal nga kalihokan sa Inibam Logistics. Apan gibakwi lang sab niya dayon ang maong pagduda.

Pagbalik ni Rey sa Cebu, maoy una niyang gipakigkitaan ang labaw nga opisyal sa Presidential Security and Intelligence Bureau-Cebu nga maoy nag-custody sa lider sa international terrorist group nga si Abaddon. Gisusi niya ang kahimtang sa dinakpan.

Gikan sa buhatan sa PSIB, milahos si Rey sa hospital nga gialagaran ni Doktora Vonna Lazaro. Apan wala didto si Vonna. Iyang nasayran nga wala mo-report si Vonna sa ospital nianang adlawa.

Gitawgan ni Rey ang cellphone ni Vonna apan dili kini makontak. Out of coverage area, matud pa. Misantop sa hunahuna ni Rey nga moadto sa gipuy-an ni Vonna aron magsusi.

Pag-abot ni Rey sa gipuy-an ni Vonna, nakugang siya sa iyang nakita paghimuntog niya sa may gate.

Nakita niya sa iyang pagsulod -- kay naabli man og diyotay ang gate -- ang security guard ni Vonna nga wala nay kinabuhi. -- Sumpayan pa